Almatydaǵy BRT qurylysy: keı ýchaskelerde kóshe jaryǵy sónedi

ALMATY. KAZINFORM — Almatydaǵy Raıymbek batyr dańǵylyndaǵy josparly jóndeý jumystaryna baılanysty keı kóshelerde jaryq sóndiriledi.

Qala ákimdiginen málim etkendeı, osy aptada Raıymbek batyr dańǵylynda mynandaı jumystar qolǵa alyndy: 

— Eski jabyndyny alý, trotýar boıyna jıektas pen granıt jıektas ornatý;
— Tas tóseý jáne aryq naýalaryn ornatý;
— Sýarý jáne kóshe jaryqtandyrý júıeleri úshin transheıalar daıyndaý;
— Kógaldandyrý, jaıaý júrginshiler aımaqtary men velojolaqtar salý.
— Barlyq jumys dańǵyldy jaıly ári qaýipsiz etýge baǵyttalǵan: oryndyqtar ornatylyp, jaryq tartylyp, jaıaý júrginshiler ótkelderi jańartylmaq. Bul turǵyndar úshin, sonyń ishinde múmkindigi shekteýli adamdar úshin de qolaıly, — dep atap ótti ákimdikten .

Jóndeý jumystary barysynda Seıfýllın kóshesinen Bókeıhanov kóshesine deıingi aralyqta kólik qozǵalysyna ýaqytsha shekteýler qoıylyp, kóshe jaryǵy sónýi múmkin.

Osyǵan deıin BRT qurylysy kezinde búlingen jıekter ǵana aýystyrylatyny týraly jazǵanbyz. 

Eske salaıyq, Raıymbek dańǵylynda BRT qurylysy sáýir aıynda bastalǵan bolatyn. 

BRT jelisiniń jalpy uzyndyǵy — 17 shaqyrym. Onyń 9 shaqyrymyn Pýshkın men Ahrımenko kósheleriniń aralyǵynda salý josparlanǵan. Joba aıasynda avtobýstarǵa arnaıy jolaqtar salynyp, jańa aıaldama keshenderi ornatylady.