Almatydaǵy birneshe qıylysta baǵdarshamdardyń jumysy ózgeredi
ALMATY. KAZINFORM — Almatyda júktemesi joǵary birqatar qıylysta qozǵalys syzbasyn túzetý boıynsha pılottyq joba qolǵa alyndy. Joba aıasynda júrginshiler men kólik qozǵalysyna arnalǵan jekelegen baǵdarsham fazalary ózgertiledi.
Almatynyń jol qozǵalysyn jáne jolaýshylar kóligin uıymdastyrý basqarmasynyń málimetinshe, ózgerister myna qıylystarda engiziledi: Nazarbaev dańǵyly — Gogol kóshesi, Abylaı han dańǵyly — Gogol kóshesi, Dostyq dańǵyly — Abaı dańǵyly, Seıfýllın dańǵyly — Maqataev kóshesi, Abaı dańǵyly — Altynsarın dańǵyly.
6 aqpanda pılottyq rejımde Nazarbaev dańǵyly men Gogol kóshesiniń, sondaı-aq Abylaı han dańǵyly men Gogol kóshesiniń qıylystarynda jańartylǵan qozǵalys syzbasy engizildi. Qalǵan ýchaskelerde osyndaı ózgeristerdi 15 aqpanǵa deıin iske asyrý josparlanyp otyr.
— Baǵdarsham nysandarynyń jumysyn túzetý Almatynyń jol qozǵalysyn jáne jolaýshylar kóligin uıymdastyrý basqarmasy men Ákimshilik polıtsııa basqarmasy birlesip júrgizdi. Pılottyq joba aıasynda júrginshilerdiń qaýipsizdigin arttyrýǵa jáne kólik qozǵalysyn jeńildetýge baǵyttalǵan qosymsha baǵdarsham fazasy engizildi, — delingen habarlamada.
Ózgerister qozǵalysty ońtaılandyrý jáne apattyq táýekeldiń qaýpin azaıtý maqsatynda eń kóp júktemesi bar qıylystarda engiziledi.
Vedomstvo júrgizýshiler men júrginshilerge baǵdarsham sıgnaldaryn muqııat qadaǵalap, Qazaqstan Respýblıkasynyń Jol qozǵalysy erejelerin qatań saqtaýdy eskertti.
Eske salaıyq, buǵan deıin Almatyda qoǵamdyq kólikke arnalǵan Avtobys tsıfrlyq jolaqy tóleý júıesin kezeń-kezeńimen engizý bastalatynyn habarlaǵanbyz.