Almatydaǵy boks keshi: Danııar Eleýsinovtiń qarsylasy jekpe-jekti aıaqtaı almady
ASTANA. KAZINFORM – Qazaqstandyq boksshy Danııar Eleýsinov (11-0, 6 KO) uzaq ýaqyt úzilisten keıin rıngke oraldy, dep habarlaıdy Sports.kz.
Ol Almatyda ótken boks keshinde fılıppındik Djo Noınaımen (23-4-2, 11 KO) judyryqtasty.
Kezdesý jartylaı orta salmaqta ótip, 9 raýndqa eseptelgen edi. Besinshi raýndtan soń Noınaı Danııardyń soqqylaryna shydaı almaı judyryqtasýdan bas tartty. Sondaı-aq fılıppındik birinshi jáne tórtinshi raýndttarda nokdaýn aldy.
Osylaısha, Danııar Eleýsinov óziniń kásibı mansabyndaǵy on ekinshi jeńisine qol jetkizip, WBC Peace beldigin jeńip aldy. Al Djo Noınaı besinshi ret jeńiliske ushyrady.
Aıta keteıik, bul Danııardyń 2021 jyldyń jeltoqsanynan keıingi birinshi kezdesýi bolatyn. Ol kezde qazaqstandyq sportshy tóreshilerdiń biraýyzdan sheshimimen argentınalyq boksshy Hýan Ernan Lealdy (15-4-1, 4 KO) jeńip, IBO nusqasy boıynsha jartylaı orta salmaqta álem chempıony ataǵyn jeńip alǵan edi.
