Almatydaǵy blekaýt kezinde «Sergek» kameralary quqyq buzýshylyqtardy tirkedi me
ALMATY. KAZINFORM — 14 tamyzda Almatyda elektr energııasynyń óshý jaǵdaılary baıqaldy. Osyǵan baılanysty Kazinform tilshisi blekaýt kezinde «Sergek» beınebaqylaý keshenderiniń qalaı jumys istegenin anyqtady.
«Sergek» júıesiniń jumysyna jaýapty kompanııanyń málimetinshe, keshenderdiń elektrmen qamtamasyz etý júıeleri ártúrli.
— Keshenderdiń bir bóligi qalalyq elektr jelisine qosylǵan, al keıbiri avtonomdy qýat kózderimen jabdyqtalǵan. Sondyqtan elektr energııasy óshken kezde keıbir keshender jumysyn jalǵastyra beredi, — dep túsindirdi «Sergek» ókilderi.
«Sergek» kameralary quqyq buzýshylyqtardy tirkeý máselesine qatysty birqatar erekshelik bar.
— Baǵdarsham óship turǵan kezde onyń sıgnaldaryna baılanysty quqyq buzýshylyqtar tirkelmeıdi. Júıe baǵdarsham kontrollerinen sıgnaldyń joqtyǵy týraly aqparat alady. Bul rette basqa da quqyq buzýshylyqtar, sonyń ishinde jyldamdyqty arttyrý jaǵdaılary jumys istep turǵan keshender arqyly tirkele beredi. Sondyqtan júrgizýshiler elektr energııasynyń óshýine senip qalmaı, jol qozǵalysy erejelerin saqtaýy qajet, — dep habarlady «Sergek» ókilderi.
Eske salaıyq, Almatydaǵy aýqymdy elektr energııasynyń óshýine baılanysty barlyq qalalyq qyzmetter kúsheıtilgen rejımde jumys istep jatyr.
Buǵan deıin KEGOC 14 tamyzda Qazaqstannyń Biryńǵaı elektr energetıkalyq júıesinde tehnologııalyq aqaý bolǵanyn habarlaǵan edi. Elektr berý jelileri ajyratylyp, energetıkter kóp uzamaı elektr jelilerin qalpyna keltire aldy.
