Almatydaǵy Baıtursynov skverin ákimdik emes, jeke ınvestor jóndeıdi
ALMATY. KAZINFORM — Baıtursynov skverin abattandyrý jáne jańartý jumystaryna qatysty jańa málimetter belgili boldy. Bul skver Nıkolskıı shirkeýiniń qasynda, burynǵy «Tselınnyı» kınoteatrynyń artynda ornalasqan.
«Tselınnyıdyń» ıeleri ǵımaratty qazirgi zamanǵy mádenıet ortalyǵyna aınaldyrǵan edi. Endi olar skverdi qaıta jóndeýdi de josparlap otyr. Jobany ǵımaratty qaıta jasaýmen aınalysqan ulybrıtanııalyq arhıtektor Asıf Han usynǵan.
Almaty ákimdigimen tıisti memorandýmǵa qol qoıylǵany belgili boldy. Alaıda jumystardyń qashan bastalatyny ázirshe naqtylanbaǵan — skver aýmaǵyndaǵy keıbir jer telimderiniń qujattaryna qatysty ruqsat pen kelisim alý protsesi áli aıaqtalǵan joq.
Almatynyń Qoǵamdyq keńistikterdi damytý basqarmasy agenttiktiń resmı saýalyna jaýap berip, memorandýmnyń mazmunyn túsindirdi.
— Basqarma men «ARTs-Galereıa» JShS arasynda Baıtursynov atyndaǵy skverdi kúrdeli jóndeýden ótkizý jóninde memorandýmǵa qol qoıyldy. Jer telimi satylmaıdy jáne jalǵa berilmeıdi, qala menshiginde qalady. Skverdi qaıta jóndeýdi JShS óz qarajaty esebinen, bıznestiń áleýmettik jaýapkershiligi aıasynda júzege asyrady, — dep túsindirdi Almaty ákimdigi.
Zań turǵysynan barlyq másele sheshilgennen keıin jeke ınvestor jobany ázirlep, ony qala ákimdigimen kelisedi.
Rekonstrýktsııadan keıin saıabaq jabylmaıdy jáne qorshalmaıdy, ol turǵyndarǵa qoljetimdi bolyp qala beredi. Jaz mezgilinde munda sýretshiler men sáýletshilerge arnalǵan kórmeler men is-sharalar uıymdastyrý josparlanyp otyr.
Eske salaıyq, 27 qyrkúıekte Almatyda elimizdegi alǵashqy boks-park — teńiz konteınerlerinen jasalǵan serýen aımaǵy jumysyn bastady.
Keshen Tóle bı kóshesi men Rozybakıev kóshesiniń qıylysynda ornalasqan, jalpy aýmaǵy — 2,7 myń sharshy metr.
