Almatydaǵy Baým toǵaıynda aǵashtardy zańsyz kesken kúdiktiler áli tabylǵan joq
ALMATY. KAZINFORM — Almaty polıtsııasy Baým toǵaıynda ondaǵan aǵashtyń zańsyz kesilýine qatysty qylmystyq isti tergeýdi jalǵastyryp jatyr.
Qoǵamdyq tártipti qamtamasyz etý bóliminiń bastyǵy Ámirbek Qudaıbergenovtiń aıtýyna qaraǵanda, aǵashtardy zańsyz kesý faktisi boıynsha Qylmystyq kodeksiniń 340-baby («Aǵashtar men butalardy zańsyz kesý, joıý nemese zaqymdaý») boıynsha qylmystyq is qozǵalǵan.
— Qazir jeke tulǵalardy anyqtaý boıynsha jedel-aldyn alý is-sharalary júrgizilip jatyr. Sonymen qatar keltirilgen zalaldy anyqtaý maqsatynda sot-bıologııalyq saraptama taǵaıyndaldy, — dedi ol Óńirlik kommýnıkatsııalar qyzmetinde ótken brıfıngte.
Eske salaıyq, Baým toǵaıynda 25 qazannan 26 qazanǵa qaraǵan túni beıtanys adamdar úshkir japyraqty úıeńki men aq qaraǵan aǵashtaryn zańsyz keskenin jazǵanbyz.
Sondaı-aq olardyń negizinen maıda japyraqty qaraǵash tuqymdasyna jatatyn 11 aǵashtyń kesýge daıyndalǵany anyqtalǵan. Oqıǵa ornynan eki qol ara men bir benzın ara tabyldy.
Almatydaǵy áıgili Baým toǵaıy baǵban, orman sharýashylyǵynyń mamany, ǵalym-dendrolog Edýard Baýmnyń bastamasymen 1894 jyly negizi qalanǵan. Qazir onda keıingi ondaǵan jyldaǵy alǵashqy qaıta jańartý jumystary júrgizilip jatyr.
Buǵan deıin toǵaıdaǵy abattandyrý jumystary kezinde birde-bir aǵash kesilmeıtinin habarlaǵanbyz.
Qazir Baým toǵaıynda 104 429 aǵash jáne 5 081 buta bar.