Almatydaǵy Baým toǵaıy abattandyrylady
ALMATY. KAZINFORM – Almaty ákimi Erbolat Dosaev Túrksib aýdanynyń turǵyndarymen kezdesý barysynda Baým toǵaıyn abattandyrý jumystarynyń qashan bastalatynyn aıtty.
Qala basshysynyń sózinshe, jańartý jobasy ázirlengen, jeltoqsanda saraptama qorytyndysy shyǵady.
«Kelesi jyly toǵaıdy retke keltire bastaımyz. Onda jaryqtandyrý, beınekameralar jáne yńǵaıly joldar paıda bolady, ıaǵnı toǵaıda júrý qaýipsiz ári jaıly bolady. Jumysty kelesi jyldyń kúzinde aıaqtaýǵa tyrysamyz», – dedi Erbolat Dosaev.
Aıta keteıik, joba aıasynda toǵaıdyń jasyl qoryn qalpyna keltirý jáne onyń ósimdik túrleriniń sanyn kóbeıtý de kózdelgen.
Osyǵan deıin Túrksib aýdanynda Qarasý ózeniniń arnasyn abattandyrý jáne Tashtıtov kóshesinde jańa demalys aımaǵynyń qurylysy aıaqtalǵany týraly jazǵan bolatynbyz.
