Almatydaǵy Baým toǵaıy abattandyrylady
ALMATY. KAZINFORM – Almatyda 2025 jyly qalanyń basty tabıǵı nysandarynyń biri – Baým toǵaıyn abattandyrý josparlanyp otyr. Bul týraly qalalyq máslıhattyń baspasóz qyzmeti habarlady.
Toǵaıdyń aýdany 137,7 gektar, ol Túrksib aýdanynda Seıfýllın men Súıinbaı dańǵyldarynyń arasynda ornalasqan.
– Jobanyń maqsaty - toǵaıdy ekologııalyq mańyzy bar aýmaq retinde jańǵyrtý, turǵyndar arasynda ekologııalyq sanany dáripteý. Tásildiń ereksheligi-toǵaıdyń tabıǵı komponentine mınımaldy aralasý. Aýmaqta shaǵyn arhıtektýralyq formalar paıda bolady: oryndyqtar, ýrnalar, sondaı-aq balalar oıyndary men sportqa arnalǵan jabdyqtar, – delingen habarlamada.
Baým toǵaıy úsh aımaqqa bólinedi:
– Belsendi aımaq-ashyq ınfraqurylymǵa qoljetimdilikti qamtamasyz etý úshin toǵaıdyń perımetri boıynsha ornalasady;
– Rekreatsııalyq aımaq-eń az ınfraqurylymy bar tynysh demalys orny bolady;
– Eko-aımaq shekteýli aralasýmen tabıǵı flora men faýnany saqtaýǵa jáne qalpyna keltirýge arnalǵan.
Osyǵan deıin Úlken Almaty ózeniniń jaǵalaýy jańartylatyny týraly jazǵan edik.