Almatydaǵy bas botanıkalyq baqta jylyjaı qurylysy aıaqtalmaı qaldy

ALMATY. KAZINFORM – Almatynyń bas botanıkalyq baǵynyń ákimshiligi jylyjaıdy qalpyna keltirýge qatysty dabyl qaqty. Mamandardyń aıtýynsha, jaǵdaı qıyn. «Stroıtelnaıa kompanııa ShAH» JShS qurylysty aıaqtamaı ketken.

«Jylyjaı 1969 jyly salynǵan, aýdany 1025 sharshy metr. Ǵımarattyń 50 jyl ishinde tabıǵı tozýy barlyq derlik metall qurylymdardyń korrozııaǵa ushyraýyna, irgetastyń jartylaı buzylýyna, shyny jabyndarynyń tyǵyzdyǵynyń buzylýyna, jalpy, búkil jylyjaı ǵımaratynyń buzylýyna ákkeldi, apatty jaǵdaıda boldy, kúrdeli jóndeý jumysyn júrgizý qajet boldy», - dep túsindirdi botanıkalyq baq ókilderi.

2020 jyly jobalyq-smetalyq qujattama ázirlenip, memlekettik saraptamadan ótti. 

«2022 jyly konkýrs qorytyndysy boıynsha kelisim-sharttar jasaldy, merdiger sol jyly jumysyn bastady, biraq 2022 jyldyń sońyna qaraı qurylystyń smetalyq qunyn kóterýdi talap etip, qurylys jumystaryn toqtatty», - dep atap ótti botanıkalyq baqtyń baspasóz qyzmeti.

Osyǵan baılanysty Botanıka jáne fıtoıntrodýktsııa ınstıtýty «Stroıtelnaıa kompanııa ShAH» JShS-n memlekettik satyp alýdyń josyqsyz qatysýshysy dep taný jáne qurylys jumystaryn aıaqtap, nysandy paıdalanýǵa berý jónindegi mindettemelerin oryndaýǵa májbúrleý týraly talap sotqa aryz berdi.

«Búgingi kúnge deıin Botanıka jáne fıtoıntrodýktsııa ınstıtýty barlyq sot protsesterin, sonyń ishinde apellıatsııalyq sot ınstantsııalarynda da jeńip shyqty. Soǵan qaramastan merdiger qurylys jumystaryn aıaqtaǵan joq. 2024 jyldyń 30 sáýirinde «Stroıtelnaıa kompanııa ShAH» JShS-men kelisim-shart merzimi aıaqtaldy», - delingen habarlamada.

Botanıkalyq baq ókilderi, atalǵan merdigermen kelisim-shartty uzartýǵa negiz joq, jańa merdiger tabý úshin barlyq protsedýralardan qaıta ótip, jańa tender jarııalaý qajet ekendigin atap ótti.
Qoldanystaǵy zańnamaǵa sáıkes, bul protsess óte uzaq ýaqytqa sozylady.

«Qazir jaǵdaı kúrdeli. Sondyqtan biz qurylys jumysyn aıaqtaýǵa kómek qolyn sozatyn demeýshiler, metsenattar jáne kez kelgen qarjy kózderin izdep jatqanymyzdy ashyq aıtamyz», - dep qortyndylady bas botanıkalyq baqtyń baspasóz qyzmeti.