Almatydaǵy balalar úıinde bolǵan órtten keıin tárbıelenýshiler qaıda ornalastyryldy
ALMATY. KAZINFORM – Almatydaǵy «Perzent» balalar úıinde shyqqan órt kezinde mekemede bolǵan 35 tárbıelenýshi men qyzmetkerler ýaqytsha saýyqtyrý sanatorııine ornalastyryldy.
Almaty ákimdiginiń málimetinshe, onda qajetti kómek pen qoldaý kórsetilip jatyr.
Tárbıelenýshilerge tamaq berilip, kıim-keshek, azyq-túlik jáne jeke gıgıena quraldary jetkizildi. Sonymen qatar balalarǵa táttiler taratylǵan.
Oqıǵa ornynda Almaty qalasy ákimdigi men Qoǵamdyq keńes ókilderi, Naýryzbaı aýdanynyń qorǵanshylyq jáne qamqorshylyq qyzmeti, sondaı-aq Otbasyny qoldaý ortalyǵy men Balalardy qoldaý ortalyǵynyń mamandary jumys istep jatyr.
– Jaǵdaı tolyq baqylaýda, - dep habarlady Almaty ákimdigi.
Eske salaıyq, buǵan deıin Almaty qalasynda órt sóndirýshiler Naýryzbaı aýdany Altyn orda kóshesi boıynda ornalasqan balalar úıindegi órtti sóndirip jatqanyn habarlaǵan edik.
Keıinirek TJM jalynnyń 1000 sharshy metr aýmaqta sóndirilgenin málimdedi.