Almatydaǵy balalar úıi Qonaev qalasyna kóshiriletin boldy
ALMATY. KAZINFORM – Almaty oblysynyń bilim basqarmasy Baǵanashyl yqshamaýdanynda ornalasqan №1 balalar úıi tárbıelenýshileriniń Konaevqa kóshirý máselesine qatysty pikir bildirdi.

Buǵan deıin áleýmettik jelilerde atalǵan mekemeniń tárbıelenýshileriniń vıdeoúndeýi taraǵan edi. Onda olar úsh aı buryn oblys ákimimen ótken kezdesýde kóshirý bolmaıdy degen kelisim jasalǵanyn jektkizdi.
Alaıda, sol kelisimge qaramastan, balalar úıin basqa qalaǵa – Konaevqa kóshirý máselesi qaıta kóterilgenin aıtty. Olar kóshýge qarsy. Atalǵan jaǵdaıǵa baılanysty Almaty oblysynyń bilim basqarmasy túsinikteme berdi. Aıtýlarynsha ǵımarat apatty jaǵdaıda tur.
– 1963 jyly salynǵan ǵımarat qazir paıdalaný úshin jaramsyz dep tanyldy. 2024 jyly «Astanaqurylysservıs» JShS júrgizgen tehnıkalyq zertteý nátıjesinde, ǵımarattyń tirek qurylymdarynda jaryqtar anyqtalǵan, al jylý jáne sý júıeleri tolyǵymen tozǵan jáne qalpyna kelmeıdi. Ǵımarat sanıtarlyq, órt qaýipsizdigi jáne qurylys talaptaryna saı kelmeıdi, - delingen resmı jaýapta.
Osyǵan baılanysty Almaty oblysy ákiminiń 2025 jylǵy 9 shildedegi qaýlysy jáne bilim basqarmasynyń 10 shildedegi buıryǵy negizinde tárbıelenýshilerdi kezeń-kezeńimen Konaev qalasyndaǵy jańa zamanaýı balalar úıine kóshirý jumystary bastaldy.
Ákimdik málimetinshe, 180 orynǵa arnalǵan jańa balalar úıi jeke ınvestorlar esebinen salynyp, memleket menshigine berilgen. Ǵımarat qazirgi zaman talabyna jáne balalar mekemelerine qoıylatyn standarttarǵa tolyq saı keledi.
Kóshirý kezeń-kezeńimen júzege asyrylady: aldymen 1-4 synypta oqıtyn 44 bala kóshiriledi. Al joǵary synyp oqýshylary keıinirek, oqý protsesiniń turaqtylyǵyn jáne áleýmettik beıimdelýin eskere otyryp kóshiriledi.
Qazir mekemede 171 bala tárbıelenip jatyr, olardyń 125-i – jetim, al 46-sy – qıyn ómirlik jaǵdaıǵa tap bolǵan balalar. Mekemede barlyǵy 85 qyzmetker jumys isteıdi, olardyń 42-si — pedagog.
– Áleýmettik jelilerde taraǵan jalǵan aqparattarǵa baılanysty, bilim basqarmasy naqtylaıdy: balalardyń bári, qaı jerde tursa da, medıtsınalyq qyzmetpen tegin qamtamasyz etiledi jáne zańnamaǵa sáıkes turǵyn úı alý kezegine turý quqyǵyna ıe. Balalar úıi ornalasatyn aýmaqtyń batpaq ekeni týraly aıtylǵan aqparat shyndyqqa janaspaıdy. Kóshirý balalardyń quqyqtaryn shektemeıdi jáne ómir súrý jaǵdaılaryn nasharlatpaıdy, - dep atap ótti vedomstvodan.
Bilim basqarmasy jańa mekemege kóshirý tárbıelenýshilerdiń qaýipsizdigin, sapaly bilim alý, medıtsınalyq kómekke qol jetkizý jáne qolaıly ómir súrý jaǵdaılaryn qamtamasyz etý maqsatynda jasalyp jatqanyn málimdedi.
Eske salaıyq, 2025 jyldyń naýryzynda Almatydaǵy Baganashyl yqshamaýdanyndaǵy №1 oblystyq balalar úıin Konaevqa kóshirý týraly aqparat paıda bolǵan edi. Sol kezde tárbıelenýshiler áleýmettik jelide ózderin burynǵy ornynda qaldyrýdy surap, vıdeoúndeý joldaǵan edi.
Keıin Almaty oblysynyń ákimdigi balalar úıiniń tárbıelenýshileri Konaevqa kóshirilmeıtinin habarlady.