Almatydaǵy balabaqshalardyń birinde búldirshin aıaýsyz soqqyǵa jyǵyldy

ALMATY. KAZINFORM – Áleýmettik jelilerde balabaqshada balalardyń top ishindegi bir búldirshindi jabylyp uryp jatqany týraly vıdeo tarady. 

«Bizdiń ulymyzdy balalar aıaýsyz soqqyǵa jyqqan. Uryp-soǵý shamamen 5 mınýtqa sozyldy. Tárbıeshi joq, óz sharýasymen shyǵyp ketken. Balamyzdyń mıy shaıqalǵan, aýrýhanaǵa jattyq. Kishkentaı balalardyń da osyndaı qatygez bolǵany ma?», - dep jazady zardap shekken balanyń ata-anasy. 

Qalalyq bilim basqarmasy jaǵdaı «№51 bóbekjaı-baqsha» balabaqshasynda bolǵanyn málim etti.

Alynǵan túsindirme hatqa sáıkes, tárbıeshi bul ýaqytta balalarǵa túski as alyp kelý úshin shyǵyp ketken. Sol sebepti, balalardyń tártibin qadaǵalaı almaǵan.

«Balabaqsha ákimshiliginiń buıryǵymen tárbıeshi qatań sógis aldy. Sonymen qatar balabaqsha meńgerýshisine de tártiptik jaza qoldanyldy», - dep habarlady Almaty qalalyq bilim basqarmasynan.