Almatydaǵy balabaqshada bolǵan jaǵdaıǵa baılanysty tergeý júrip jatyr

ALMATY. KAZINFORM – Almatydaǵy balbaqshalardyń birinde búldirshiniń soqqyǵa jyǵylýyna baılanysty tergeý jumystary júrgizilip jatyr, dep habarlady QR Oqý-aǵartý mınıstrliginiń Balalardyń quqyqtaryn qorǵaý komıteti.

«Balalardyń quqyqtaryn qorǵaý komıteti zardap shekken balanyń anasymen baılanysqa shyqty. Qazir balaǵa barynsha medıtsınalyq kómek kórsetilip jatyr. Sondaı-aq, tergeý amaldary júrgizilýde. Atalǵan másele Komıtet baqylaýynda»,-delingen habarlamada.

Osyǵan deıin Almatydaǵy balabaqshalardyń birinde búldirshin aıaýsyz soqqyǵa jyǵylǵanyn jazdyq.

«Bizdiń ulymyzdy balalar aıaýsyz soqqyǵa jyqqan. Uryp-soǵý shamamen 5 mınýtqa sozyldy. Tárbıeshi joq, óz sharýasymen shyǵyp ketken. Balamyzdyń mıy shaıqalǵan, aýrýhanaǵa jattyq. Kishkentaı balalardyń da osyndaı qatygez bolǵany ma?», - dep jazady zardap shekken balanyń ata-anasy.

Qalalyq bilim basqarmasy jaǵdaı «№51 bóbekjaı-baqsha» balabaqshasynda bolǵanyn málim etti.

Alynǵan túsindirme hatqa sáıkes, tárbıeshi bul ýaqytta balalarǵa túski as alyp kelý úshin shyǵyp ketken. Sol sebepti, balalardyń tártibin qadaǵalaı almaǵan.

«Balabaqsha ákimshiliginiń buıryǵymen tárbıeshi qatań sógis aldy. Sonymen qatar balabaqsha meńgerýshisine de tártiptik jaza qoldanyldy», - dep habarlady Almaty qalalyq bilim basqarmasynan.

Sondaı-aq, 3 jastaǵy balanyń ata-anasynyń aryzy boıynsha Jetisý aýdandyq polıtsııa basqarmasy tekserý jumystaryn júrgizdi.

«Balabaqsha qyzmetkerlerin, sondaı-aq balalardyń ata-analaryn jaýapqa tartý máselesi sheshilip jatyr», - dep habarlady Almaty qalalyq polıtsııa departamentiniń baspasóz qyzmetinen.