Almatydaǵy bala ólimi: marqumnyń anasy aýrýhana qyzmetin tekserýdi talap etti
ALMATY. KAZINFORM – Almatyda bala óliminen keıin marqumnyń anasy qalalyq balalar ınfektsııalyq aýrýhanasynyń qyzmetine jospardan tys tekseris júrgizýdi surady.
Áleýmettik jelide taraǵan vıdeoda áıel adam Almaty klınıkalyq balalar ınfektsııalyq aýrýhanasy dárigerlerin «nemquraıdylyq tanytty» dep aıyptady.
Onyń aıtýynsha, bala 1-5 qazan aralyǵynda ishi aýyrsynyp, qusa bastaǵan soń aýrýhanaǵa jatqyzylǵan. Ol osy ýaqyt aralyǵynda nesep pen nájis shyǵarmaǵan, al 6 qazanda jaǵdaıy kúrt nasharlap, jansaqtaý bólimine aýystyrylǵanymen, bala qaıtys bolǵan.
– Ólim týraly kýálikte balanyń qazasyna túınek (ishekterdiń túıilip qalýy) sebep bolǵany kórsetilgen. Bul – der kezinde jáne sapaly tekserý júrgizilgen jaǵdaıda emdeletin dıagnoz. Osyǵan baılanysty Almaty klınıkalyq balalar ınfektsııalyq aýrýhanasynyń qyzmetine jospardan tys tekseris júrgizýdi suraımyz, - dedi advokat Aıda Qýandyqova.
Qalalyq qoǵamdyq densaýlyq saqtaý basqarmasy oqıǵaǵa qatysty túsinik berdi.
Vedomstvonyń baspasóz qyzmetiniń málimetinshe, Densaýlyq saqtaý mınıstrligi Medıtsınalyq jáne farmatsevtıkalyq baqylaý komıtetiniń departamentine tekseris júrgizý týraly resmı hat joldanǵan.
– Oqıǵaǵa obektıvti jáne jan-jaqty baǵa berý úshin QR Densaýlyq saqtaý mınıstrliginiń Medıtsınalyq jáne farmatsevtıkalyq baqylaý komıtetiniń Almaty boıynsha departamentine tekseris júrgizý jóninde hat joldandy. Onyń naqty sebepteri men mán-jaıy tekseris qorytyndysynan jáne sot-medıtsınalyq saraptamasy aıaqtalǵannan keıin belgili bolady, - delingen Almaty qoǵamdyq densaýlyq saqtaý basqarmasynyń resmı jaýabynda.
Eske salaıyq, buǵan deıin Qostanaı oblysynda mobıldi toptan medıtsınalyq kómek alǵan naýqastyń ólimine baılanysty tergeý bastalǵanyn jazǵanbyz.