Almatydaǵy «Baǵanashyl» balalar úıiniń birneshe korpýsy buzyldy
ALMATY. KAZINFORM — Almatynyń Baǵanashyl shaǵyn aýdanyndaǵy balalar úıin qaıta jańǵyrtý jumystary jalǵasyp jatyr.
Qalalyq bilim basqarmasynyń málimetinshe, qazirgi tańda jobanyń iske asý barysy belgili boldy.
— Júrgizilgen tehnıkalyq tekseris nátıjesinde ákimshilik jáne oqý korpýstary, sondaı-aq sport jáne akt zaldary ornalasqan ǵımarattardy seısmıkalyq turǵydan kúsheıtý múmkin emestigi anyqtalǵan. Osyǵan baılanysty olardy buzý týraly sheshim qabyldanyp, qazirgi ýaqytta bul nysandardy demontajdaý jumystary tolyq aıaqtaldy, — dep habarlady vedomstvo.
Joba aıasynda jatyn korpýsyn qaıta jańǵyrtý, sondaı-aq jańa oqý, sport jáne ákimshilik ǵımarattar men ashana salý josparlanǵan. Qurylys jumystaryn 2026 jyldyń tórtinshi toqsanynda aıaqtaý kózdelip otyr.
Aıta keteıik, «Baǵanashyl» balalar úıiniń ǵımaraty 2025 jylǵy tamyz aıynda qalanyń kommýnaldyq menshigine ótken. Al qarasha aıynda qaıta jańǵyrtý jumystary bastalyp, sol kezde eski ǵımarattyń ornyna zaman talabyna saı jańa nysan salynatyny aıtylǵan edi.
Qaıta jańǵyrtý kezeńinde tárbıelenýshiler Almatydaǵy № 2 arnaıy áleýmettik qyzmetterge muqtaj balalardy qoldaý ortalyǵyna ýaqytsha ornalastyryldy. Qazir onda 100-den astam bala turyp jatyr.
Eske salaıyq, 2025 jyly naýryz aıynda bul balalar úıi tóńireginde daý shyqqan bolatyn. Balalar úıiniń tárbıelenýshileri vıdeoúndeý jasap, olardy Almatydan Qonaevqa kóshirýge qarsylyq bildirip, ózderin qalada qaldyrýdy suraǵan.
Osydan keıin Almaty oblysynyń ákimdigi resmı málimdeme jasap, qazirgi tárbıelenýshilerdiń Almatyda qalatynyn, al endi qabyldanatyn balalar Qonaevtaǵy jańadan salynǵan ortalyqqa ornalastyrylatynyn habarlaǵan.
Degenmen araǵa birneshe aı salyp, áleýmettik jelilerde balalardyń taǵy bir vıdeoúndeýi tarady. Onda olar kóshirý máselesi qaıta kóterilgenin aıtyp, alańdaýshylyq bildirgen.
Keıin áleýmettik jelilerde balalardy kúshtep kóshirýge áreket jasalǵany túsirilgen vıdeo tarady. Onda balalar qarsylyq tanytyp, bul jaıt qoǵamda úlken rezonans týdyrdy.
Osydan keıin Prezıdenttiń tapsyrmasymen balalardy kóshirý sheshimi tolyqtaı toqtatylyp, mán-jaıdy anyqtaý úshin qyzmettik tekseris júrgizildi.
Tekserý qorytyndysy boıynsha Almaty oblysy ákiminiń orynbasary jáne eki basqarma basshysy qyzmetinen bosatyldy.