Almatydaǵy aınalma temirjol júktemeni 40%-ǵa azaıtty
ASTANA. KAZINFORM – Qazaqstan kólik salasynda tranzıttik-logıstıkalyq áleýetti damytý baǵytyndaǵy jumystardy kúsheıtip jatyr. Osy maqsatta Kólik mınıstrliginiń basshylyǵy Almaty qalasyndaǵy negizgi ınfraqurylymdyq jobalardyń iske asyrylý barysyn tekserdi.
Jumys sapary aıasynda ótken kóshpeli keńeste «Altynkól – Jetigen» temirjol ýchaskesin jańǵyrtý jáne Almaty stantsııasyn aınalyp ótetin temirjol jelisin salý jobalarynyń oryndalý barysy qaraldy.
– Uzyndyǵy 293 km bolatyn «Altynkól – Jetigen» ýchaskesinde negizgi qurylys jumystary aıaqtaldy. Jobany iske asyrý nátıjesinde ótkizý qabileti táýligine 18 jup poıyzdan 33 jup poıyzǵa deıin artty. Bul qozǵalys qaýipsizdigi men tıimdiligin edáýir jaqsartty, – delingen habarlamada.
Almaty stantsııasyn aınalyp ótetin uzyndyǵy 74,5 km temirjol jelisi 2025 jyldyń jeltoqsanynda iske qosylǵan. Búginde ol arqyly 150 myń tonnadan astam júk tasymaldanǵan.
– Jańa jeli Almaty temirjol torabyna túsetin júktemeni 40%-ǵa azaıtyp, júk jetkizý merzimin bir táýlikke deıin qysqartýǵa múmkindik berdi. Nysan tolyq iske qosylǵannan keıin 300-den astam turaqty jumys orny ashylady, – dep habarlady mınıstrlik.
Sonymen qatar «Zhetysu» logıstıkalyq termınalynyń qurylysy da aıaqtalýǵa jaqyn. Jobanyń qýattylyǵy jylyna 115 myń konteınerdi (DFE) quraıdy. Termınaldy paıdalanýǵa berý 2026 jyldyń mamyryna josparlanǵan.
Almaty-1 temirjol vokzalyn jańǵyrtý jumystary da jalǵasýda. Joba aıasynda ǵımarat zamanaýı ınjenerlik júıelermen, kútý zaldarymen jáne múmkindigi shekteýli azamattarǵa arnalǵan ınfraqurylymmen jabdyqtalady.
Sapar qorytyndysy boıynsha jaýapty organdarǵa jobalardy belgilengen merzimde aıaqtaý jáne tranzıttik tasymal kólemin 2026 jyly 55 mln tonnaǵa jetkizý jónindegi tapsyrmany oryndaý úshin jumys qarqynyn kúsheıtý tapsyryldy.
Aıta keteıik, atalǵan jobalar Qazaqstannyń halyqaralyq kólik dálizderindegi rólin kúsheıtip, eldi iri logıstıkalyq habqa aınaldyrýǵa baǵyttalǵan.
Buǵan deıin «Astana-Tehnopolıs» arnaıy ekonomıkalyq aımaǵynda logıstıkalyq park qurylatyny habarlandy.
