Almatydaǵy «áıelder marshy», «lesbıler sherýi» – USAID syndy uıymdardyń jumys nátıjesi – Májilis depýtaty
ASTANA. KAZINFORM – Almatydaǵy «áıelder marshy», «lesbıler sherýi» – USAID syndy uıymdardyń jumys nátıjesi. Bul jaıynda Májilis depýtaty Magerram Magerramovtyń Ulttyq ekonomıka jáne Ádilet mınıstrlikterine joldaǵan saýalynda aıtylǵan.
- Aq úıdiń resmı málimdemesinde USAID-tiń ondaǵan jyldar boıy «zııandy jobalardy» qarjylandyrýmen aınalysqany naqtylanǵan. Resmı tulǵalar, máselen Ilan Mask, tipti prezıdenti Donald Tramp USAID-ti «qunyqqan radıkaldar basqaratyn» qylmystyq uıym dep atady. Aq úıdiń resmı málimdemesinde USAID agenttiginiń salyq tóleýshilerge múldem esep bermegeni jáne qomaqty aqsha qarajatyn «aqylǵa syımaıtyn» jáne «zııandy» jobalarǵa baǵyttaǵany anyq naqtylanǵan, - dedi Májilis depýtaty.
Máselen, onyń dereginshe, USAID Kolýmbııada «transgenderlik operaǵa» 47 myń dollar, Perýde «transgenderlik komıkske» 32 myń dollar, Mysyrda týrızmdi qarjylandyrýǵa 6 mln dollar, Gvatemalada «jynys aýystyrýǵa» jáne «LGBT- aktıvızmge» 2 mln dollar, Serbııada eńbek ujymdary men iskerlik qoǵamdastyqtarǵa teńdik pen ınklıýzıvtilikti ilgeriletýge 1,5 mln dollar, Aýǵanstanda «sýarý arnalaryn, aýyl sharýashylyǵy jabdyqtaryn» qarjylandyrýǵa, tipti kóknár ósirý men geroın óndirisin qoldaýǵa júzdegen mln dollar bólgen. Munan bólek, dál osy uıym «Ál-Kaıda» (Qazaqstanda tyıym salynǵan - red.) sodyrlaryna júzdegen myń portsııa tamaq jibergen.
Sondaı-aq atalǵan uıym 2022-2025 jyldary Ortalyq Azııada adam quqyǵy men teńdikti nyǵaıtýǵa 2 mln dollar bólgen. Al qarjy bólingen baǵdarlamany oryndaýshy – Eýropalyq halyqaralyq lesbıandar, geıler, bıseksýaldar, transgenderler jáne ınterseksýaldar qaýymdastyǵy.
- Qandaı qarajat kimge, qaıda jáne qandaı maqsatqa bólinetindigin, olardy kim alatyndyǵyn jáne elimizde qandaı jobalardy júzege asyratyndyǵyn anyqtaý qajet dep sanaımyz. Óıtkeni, «seksýaldy azshylyq quqyǵy» degen uranmen keıbir toptardyń belsendiligi oqtyn-oqtyn baıqalady jáne bul qoǵamymyzdyń ishki suranysynan emes, syrty áserden, onyń ishinde syrttaı qarjylyq qoldaýdan týyndap otyr. Almaty qalasynyń ortalyǵyndaǵy «áıelder marshy», «lesbıler sherýi» dep atalatyn sherýler jáne olardy ótkizýge úzdiksiz umtylys osyndaı uıymdar qyzmetiniń nátıjesi sanalady, - dedi Magerram Magerramov.
Osyǵan oraı Májilis depýtaty sheteldik demeýshiler bóletin qarjy qarajatyna aýdıt júrgizip, barlyq esep-qısabyn halyqqa jarııalaýdy, mundaı zııandy jobalardan balalardy qorǵaıtyn arnaýly zań jobasyn ázirleýdi usynyp otyr.
Buǵan deıin AQSh USAID-ty nege taratpaq bolǵanyn jazǵan edik.