Almatydaǵy avtonomdy kitaphanalar qanshalyqty suranysqa ıe
ALMATY. KAZINFORM – Almatyda avtonomdy kitaphanalardy qoldaný úshin oqyrman bıletin alatyn adamdar kóbeıgen.
Almatyda bıyl 24 avtonomdy kitaphana iske qosyldy. Almaty kitaphanalarynyń oqyrman bıleti bar kez kelgen turǵyn bul apparattan kitap ala alady. Keıin alynǵan kitapty 24 avtomattyń kez kelgenine nemese qalalyq kitaphanalar fılıalyna qaıtarýy tıis.
Almaty qalasy Ortalyqtandyrylǵan kitaphana júıesiniń dırektory Meıram Bektembaev Kazinform tilshisine derbes kitaphanalardyń jumysy men kitap qory týraly aıtyp berdi.
Onyń sózinshe, Ortalyqtandyrylǵan kitaphana júıesiniń quramynda 28 kitaphana-bólimshe bar. Odan bólek qalada 24 avtonomdy kitaphana jumys isteıdi. Olar halyq kóp shoǵyrlanatyn oryndarda, sonyń ishinde metro stantsııalarynda (Raıymbek batyr, Jibek Joly, Almaly, Abaı, Baıqońyr, Muhtar Áýezov, Alataý, Saıran, Máskeý), Medeý jáne Áýezov aýdandyq halyqqa qyzmet kórsetý ortalyqtarynda, «Spýtnık», «Atakent», «Azııa Park», «Silk Way», «Esentai», «Dostyk Plaza», «FORUM» saýda ortalyqtarynda, sondaı-aq «SAIL» kovorkınginde, № 97 gımnazııa-mektebinde, Túrksib, Medeý, Almaly jáne Alataý aýdandarynyń komıýnıtı-ortalyqtarynda ornalasqan.
— Ortalyqtandyrylǵan kitaphana júıesiniń kitap qory — 1 322 904. Qazirgi ýaqytta avtonomdy kitaphanalardyń kitap qorynda 541 ataýmen 10 019 dana kitap bar. Onyń 297 ataýy qazaq, 241 ataýy orys tilinde, 3 ataýy aǵylshyn tilinde. Ornatylǵan sátten bastap oqyrmandarǵa jalpy sany 3 394 dana kitap berilip, paıdalanýǵa usynyldy, - dedi ol.
Avtonomdy kitaphanalar ornatylǵan ýaqyttan bastap jańa 2 868 oqyrman tirkelgen. Aıtýynsha, bul kitap apparattary iske qosylǵannan keıin oqyrman bıletin alýshylar sany edáýir artqanyn kórsetedi.
— Sebebi avtonomdy kitaphanalardyń janynda kitaphana qyzmetkerleri kezekshilik atqaryp, kitap alǵysy kelgen barlyq qala turǵyndaryna oqyrman bıletin jedel túrde rásimdeıdi. Mundaı ádis ýaqytty tıimdi paıdalanyp, qolaıly jaǵdaı jasaıdy. 2025 jyly avtonomdy kitaphanalar sanyn kóbeıtý josparlanyp otyr, - dedi dırektor.
Sonymen qatar Meıram Bektembaev búginge deıin avtonomdy kitaphanalarǵa zaqym keltirý faktileri tirkelmegenin atap ótti.
Aıta ketken jón, «Kitaphanany paıdalaný jáne jumys isteý erejelerine» sáıkes, avtonomdy kitaphanalardan oqyrman kitapty úıge 15 kúnge alyp, merzimdi taǵy 15 kúnge uzarta alady. Eger paıdalanýshy baspa ónimin belgilengen merzimde qaıtarmasa, kitaphana qyzmetkerleri onymen baılanysqa shyǵady.
— Kitapty joǵaltyp alǵan jaǵdaıda, paıdalanýshy ony balamaly túrde — quny men shyǵarylǵan jyly boıynsha teń keletin, kitaphana qorynda suranysqa ıe basylymmen almastyrýy tıis, - dedi Meıram Bektembaev.
Eske salaıyq, buǵan deıin Nıý-Iork kitaphanasyna qazaqtyń tanymal tulǵalarynyń kitaptary qoıylǵanyn jazǵanbyz.