Almatydaǵy avtobýs apaty: prokýror sottalýshyny 8 jylǵa sottaýdy surady

ALMATY. KAZINFORM — Almaty qalasynyń qylmystyq ister jónindegi mamandandyrylǵan aýdanaralyq sotynda úsh adamnyń ómirin qıǵan avtobýs apatyna qatysty sot otyrysy ótip jatyr.

Búgingi jaryssózde prokýror is boıynsha aıyptaý aktisin oqydy. Onyń aıtýynsha, 2023 jyldyń 22 jeltoqsany kúni keshke № 47-baǵyttaǵy avtobýstyń jolaýshysy Darhan Ahmetjanov pen júrgizýshi Ermek Shókebaevanyń arasynda jol aqysyn tólemeýge baılanysty janjal shyqqan.

«Ahmetjanov júrgizýshiniń jol aqysyn tóle degen talabyna ashýlanyp, júrgizýshiden kóliktiń ruqsat etilmegen jerinde toqtatýdy talap etken. Biraq, júrgizýshi toqtaǵan joq, óıtkeni ol bul jol erejesin buzý ekenin bildi. Sodan keıin aıyptalýshy avtobýstyń júrgizýshisi Shókebaevaǵa oń qolymen eki ret soqqa jasaǵan. Shókebaeva osy jaǵdaıda birneshe sekýndttqa esinen tanyp, jol boıyndaǵy jaıaý júrginshiler men kólikti qaqqan», – dedi prokýror.

Prokýrordyń aıtýynsha, aıyp tolyq dáleldengen. Sottalýshy kinásin tolyq moıyndamaǵan.

«Qurmetti sot, sottalýshynyń jeke basyn, jábirlenýshi taraptyń pikirin, qylmystyń qoǵamǵa qaýiptiligin eskere otyryp, Ahmetjanov Darhan Maratulyn QR QK 293-babynyń 1-bóligi, QR QK 351-babynyń 3-bólimimen kináli dep tanyp 8 jylǵa bas bostandyǵynan aıyrýdy suraımyn», – deıdi ol.

Buǵan deıin sottalýshy Ahmetjanov 293-baptyń 1-bóligi («Buzaqylyq») boıynsha ǵana kinásin moıyndap, adamdardyń ólimine júrgizýshini kinálaǵan bolatyn. 

Aıta keteıik, QR Joǵarǵy Soty Almatydaǵy avtobýs apatyna qatysty kezekti sot otyrysyn tikeleı efırde kórsetý týraly sheshim qabyldady. Sol sebepti kezekti sot otyrysynyń onlaın translıatsııasy Joǵarǵy Sottyń YouTube-kanalynda kórsetildi. 

Eske salsaq, ótken jyly jeltoqsan aıynda Almatyda № 47-shi baǵyttaǵy qoǵamdyq kóliktiń ishinde Darhan Ahmetjanov janjal shyǵaryp, júrgizýshi áıeldi urǵan. Saldarynan áıel esinen tanyp, kólikti basqara almaı, aıaldamada turǵan bir top adamdy qaqqan. Apat saldarynan 7 adam zardap shegip, 3 adam qaıtys boldy.