Almatydaǵy avtobýs apaty: avtobýsty qolymen tejegishti basqan stýdent toqtatqan
ALMATY. KAZINFORM – Almatyda avtobýs júrgizýshisin uryp, úsh adamnyń ólimine sebepker bolǵan jolaýshyǵa qatysty kezekti sot otyrysy ótti.
Búgin jábirlenýshi tarap sottalýshy men jaýapkerden materıaldyq jáne moraldyq ótemaqy tóleý jóninde talap qoıdy.
«Azamattyq kodekske sáıkes, «Dýman Trans» pen Shókebaevadan moraldyq ótemaqy óndirý týraly talap aryz bere alamyz. Ata-ananyń árqaısysy úshin 20 mln-nan, jıyny 40 mln teńgeni óndirip alýdy talap etemiz. Onyń 4/1 bóligin, ıaǵnı, 10 mln teńgesin sottalýshy Ahmetjanov, avtobýs júrgizýshisi de solaı, al «Dýman Trans» JShS zańdy tulǵa bolǵan soń 20 mln teńge tóleýi tıis», — dedi jábirlenýshilerdiń advokattary.
Avtobýs apatynda eri Aıdos Álmenbaevtan aıyrylǵan azamatsha Qusaıynova A. sotqa 20 mln teńge kóleminde ótemaqy óndirip alý týraly talap aryzben júgingen. Sonymen qatar, apat kezinde eriniń kóligi zaqymdanǵan. Sarapshy shyǵyndy 4 mln 27 myń teńgege baǵalaǵan. Sondaı-aq jerleý men eske alý sharalaryna 2 mln 320 myń teńge qarjy jumsalǵan. Osylaısha Qusaıynova sottalýshydan 6 mln teńge kóleminde materıaldyq shyǵyn óndirýdi talap etti. Odan bólek moraldyq shyǵyn boıynsha 20 mln teńgeniń 4/1 bóligin, ıaǵnı, 5 mln teńgeni sottalýshy, avtobýs júrgizýshisi — 5 mln teńge, «Dýman Trans» JShS 10 mln teńge tóleýi tıis boldy.
Osydan soń jol apaty kezinde avtobýsta bolǵan kýáler shaqyryldy. Jeńis Taıbek esimdi stýdent avtobýs ishinde bolǵan oqıǵalany aıtty.
«Avtobýs ishinde jolaqyny tóleý máselesi boldy. Avtobýs júrgizýshisi Ahmetjanovtan jolaqysyn tóleýdi talap etti. Keıin ol tóledi ma bilmeımin, birazdan soń balaǵat sózder aıtyla bastady. Men júrgizýshniń týra artyndaǵy artyndaǵy oryndyqta otyrǵan edim. Janymda dosym Ámirhan boldy. Ahmetjanov júrgizýshini eki ret soqqanyn kórdim. Men ony sottalýshyny ustaýǵa áreket jasadym. Júrgizýshi «tormoz, tormoz, ustańdar, sol kináli, qashyp ketpesin, ustalsyn» dep aıqaılaǵany esimde. Osydan soń men baryp tejegishten júrgizýshiniń aıaǵyn alyp, qolymmen tejegishti bastym. Osylaısha avtobýsty toqtattym. Jol apatynan meniń basym jaryldy. Avtobýstan shyqqan soń ólgen adamdy kórdim, shok jaǵdaıda boldym», — dedi kýáger Jeńis Taıbek.
Ekinshi shaqyrylǵan kýá stýdent Shaqantaı Ámirhan sottalýshy avtobýstyń artqy esiginen túsip ketpekshi bolǵanyn aıtty.
«Alaıda júrgizýshi oǵan esikti ashqan joq. Ahmetjanov júrgizýshige SMS barmaı jatyr dedi. Júrgizýshi «kelesi aıaldamaǵa deıin tólep qoıyńyz» dedi. Sonda Ahmetjanov: «osy jerden tastap ketińiz» dedi. Alaıda júrgizýshi júrip ketti. Sottalýshy balaǵat sózderin aıta bastady. Júrgizýshi: «qolyńnan kelse iste» dedi. Aınalasy 10 sekýnd ishinde qaıǵyly jaǵdaı boldy. Júrgizýshi «tormoz, tormoz, shyǵarmańdar» dedi. Apattan soń syrttan kisiler avtobýs esigin syndyryp kirdi. Júrgizýshi áıel: «bárine osy kisi kináli» dep Ahmetjanovty kórsetti», — dedi Shaqantaı Ámirhan.
Osydan soń sýdıa T.Shakırov kelesi sot otyrysyn 24 sáýirge shegeretinin málimdedi. Osylaısha Almatydaǵy avtobýs apatyna qatysty sot otyrysy osymen besinshi márte keıinge shegerildi.
Eske salsaq, avtobýsta júrgizýshi áıeldi urǵan Darhan Ahmetjanovqa qatysty sot otyrysy 20 naýryzda bastalǵan edi.
Aıta keteıik, ótken jyly Almatyda № 47-shi baǵyttaǵy qoǵamdyq kóliktiń ishinde Darhan Ahmetjanov janjal shyǵaryp, júrgizýshi áıeldi urǵan. Saldarynan áıel esinen tanyp, kólikti basqara almaı, aıaldamada turǵan bir top adamdy qaqqan.
Apat saldarynan 7 adam zardap shegip, 3 adam qaıtys boldy.
