Almatydaǵy Áýezov teatrynyń jóndeý jumystary qashan aıaqtalady
ALMATY.KAZINFORM — Muhtar Áýezov atyndaǵy qazaq ulttyq drama teatrynyń ǵımaratyn qaıta jańǵyrtý jumystaryn 2026 jyldyń sońyna deıin aıaqtaý josparlanyp otyr. Alaıda bas sahnada spektaklder qashan qaıta qoıylatyny ázirge belgisiz.
Muny Mádenıet jáne aqparat mınıstrliginiń Mádenıet komıteti Kazinform agenttiginiń resmı saýalyna bergen jaýabynda málimdedi.
— Muhtar Áýezov atyndaǵy qazaq ulttyq drama teatrynyń ǵımaratyn, ınjenerlik jáne tehnologııalyq júıelerin qaıta jańǵyrtý jumystary 2024 jylǵy 25 qarashada bastaldy. Nysandy qaıta jańǵyrtý jáne paıdalanýǵa berý jumystary 2026 jyldyń sońyna deıin aıaqtalady dep josparlanǵan, — dedi Mádenıet komıteti tóraǵasynyń orynbasary Sherhan Talapov.
Vedomstvo ǵımarat ishindegi demontaj jumystary tolyq aıaqtalǵanyn habarlady. Qazir qurylysshylar ǵımarattyń qurylymdyq bólikterin kúsheıtip, qasbeti men shatyryn qalpyna keltirip jatyr. Sonymen qatar ishki árleý jumystary júrgizilip, ınjenerlik jeliler men qaýipsizdik júıeleri jańartylyp jatyr.
— Qurylys-montaj jumystary jańartylǵan kestege sáıkes júrgizilip jatyr. Jumystardyń tehnıkalyq talaptary men jobalyq sheshimderi tehnıkalyq jáne avtorlyq qadaǵalaý arqyly qamtamasyz etiledi, — dep habarlady Mádenıet komıteti.
Teatrda qoıylymdar qashan qaıta qoıylady?
Negizgi qurylys jumystary aıaqtalǵannan keıin de teatr kórermenderdi birden qabyldaı almaıdy. Komıtet málimetinshe, teatr tolyqqandy jumys isteýi úshin sahnanyń tómengi mehanıkasyna arnalǵan jabdyqtardy ornatyp, iske qosý qajet. Bul jabdyqtar teatrdyń jeke tehnıkalyq parametrlerine sáıkes arnaıy daıyndalyp jatyr. Budan bólek, keshendi synaqtar ótkizý kerek.
— Qurylys-montajdyń negizgi kezeńiniń aıaqtalýy bas sahnanyń qoıylymǵa daıyn ekenin bildirmeıdi. Jumystardyń tehnologııalyq retin eskere otyryp, bas sahnadaǵy qoıylymdardyń naqty merzimi qajetti sharalar aıaqtalyp, nysannyń daıyndyǵy rastalǵannan keıin belgilenedi, — delingen komıtet jaýabynda.
Teatrdyń ishi qalaı ózgeredi?
Joba boıynsha teatrdyń ishki keńistikteri men tehnıkalyq ınfraqurylymy tolyq ózgertilýi tıis. Úlken jáne kishi kórermen zaldary, sahna keńistikteri, daıyndyq zaldary, kostıým jáne grım bólmeleri, kórkemdik-dekoratsııalyq tsehtar, dybys jazý, foto jáne beınestýdııalar, foıe men kassa aımaǵy, ákimshilik jáne ártisterge arnalǵan bólmeler, sondaı-aq tehnıkalyq jáne qosalqy aýmaqtar jańartylady.
Budan bólek, ınjenerlik kommýnıkatsııalar tolyq aýystyrylyp, sahnalyq jáne mýltımedıalyq jabdyqtar jańartylady. Zamanaýı akýstıkalyq júıeler de ornatylady.
— Órt qaýipsizdigi, ǵımarattyń seısmıkalyq tózimdiligi talaptaryn saqtaý jáne nysandy paıdalaný kezinde qolaıly jaǵdaı jasaý máselelerine erekshe nazar aýdarylady, — dep habarlady komıtet.
Qaıta jańǵyrtý aıaqtalǵannan keıin ǵımarattyń jalpy aýdany 30 497 sharshy metr bolady. Úlken kórermen zaly 634 orynǵa, al kishi zal 201 orynǵa eseptelmek. Osylaısha, eki zaldyń jalpy syıymdylyǵy 835 oryn bolady.
Sonymen qatar joba aıasynda erekshe qajettiligi bar adamdar men júrip-turýy qıyn azamattar úshin kedergisiz orta qalyptastyrý qarastyrylǵan.
Ǵımarattyń tarıhı kelbeti qalaı saqtalady?
Muhtar Áýezov atyndaǵy qazaq ulttyq drama teatrynyń ǵımaraty jergilikti mańyzy bar sáýlet eskertkishi sanalady. Sondyqtan qaıta jańǵyrtý jobasy tehnıkalyq ınfraqurylymdy jańartyp, teatrdyń múmkindikterin keńeıtýmen qatar, ǵımarattyń tarıhı kelbetin saqtaýdy da kózdeıdi.
— Osy maqsatta qasbettiń sáýlettik jáne sándik elementteri 3D-skanerleý tehnologııasy arqyly jasaldy. Olardy tarıhı kelbetin ózgertpeı, zamanaýı materıaldardy paıdalana otyryp qaıta qalpyna keltirý josparlanǵan, — dep atap ótti vedomstvo.
Komıtet málimetinshe, ǵımarat ishindegi mozaıkalyq kompozıtsııalar men barelefterdi de bastapqy kórkemdik erekshelikterin saqtaı otyryp qalpyna keltirý kózdelgen. Qaıta jańǵyrtý jumystarynyń basty mindetteriniń biri — teatrdyń tarıhı jáne sáýlettik qundylyǵyn saqtaý.
Qaıta jańǵyrtý jumystaryn kim júrgizip jatyr jáne quny qansha?
Jobanyń tapsyrys berýshisi — Muhtar Áýezov atyndaǵy qazaq ulttyq drama teatry. Bas jobalaýshy uıym — «Aktıýbgrajdanproekt» óndiristik kooperatıvi, al bas merdiger — BI Urban Construction JShS.
Komıtettiń habarlaýynsha, jobany iske asyrý mádenı mura nysanyn saqtaýǵa, teatr ınfraqurylymyn jańǵyrtýǵa, kórermender men shyǵarmashylyq ujym úshin qaýipsiz ári qolaıly jaǵdaı jasaýǵa múmkindik beredi.
Alaıda vedomstvo qaıta jańǵyrtý jumystarynyń quny, bólingen jáne ıgerilgen qarajat kólemi týraly aqparatty aıtpady.
— Jobanyń quny, onyń ishinde bólingen jáne ıgerilgen qarajat kólemi týraly málimetter «Qyzmettik paıdalaný úshin» degen belgisi bar qujattarda bolady jáne ol taralýy shekteýli qyzmettik aqparatqa jatady. Belgilengen shekteýlerge baılanysty suratylǵan qarjylyq kórsetkishterdi usyný múmkin emes, — delingen komıtet jaýabynda.
Eske salsaq, buǵan deıin Muhtar Áýezov atyndaǵy teatrdy jańǵyrtý jobasy qaı satyda ekenin jazǵan edik.
Sondaı-aq 2020 jyly Áýezov teatryna «Ulttyq» mártebesi berilgen edi.
