Almatydaǵy «Atakentti» jańartý jumystary qashan bastalady – ákim jaýap berdi
ALMATY. KAZINFORM – «Atakent» iskerlik yntymaqtastyq ortalyǵyn qaıta qurý jumystary bastalady.
Almaty ákimdiginiń málimetinshe, qaıta qurý 2025 jyldyń shilde aıynan bastap kezeń-kezeńimen júrgiziledi. Joba aıasynda 74 myń m² jol men trotýardy kóriktendirý, 170 myń m² jasyl aımaqty abattandyrý, jaryq shamdary, kóshe jıhazdary, sport alańdary, modýldi ájethanalar men avtomattandyrylǵan sýarý júıesin ornatý josparlanǵan.
Nysandy aralap kórgen Almaty ákimi aǵashtardyń ártúrli bolýyna mán berip, Almatynyń klımattyq erekshelikterine saı japyraqty aǵash túrlerin otyrǵyzýdy tapsyrdy.
– «Atakenttiń» sýburqaq kesheni qaladaǵy eń kórikti oryndardyń birine aınalýy kerek. Bul jobanyń júregi bolmaq, - dedi Darhan Satybaldy.
Eske salaıyq, buǵan deıin Almatyda «Atakent» aýmaǵy jańartylatynyn jazǵanbyz.
Odan bólek «Atakent» iskerlik ortalyǵynyń aýmaǵyndaǵy jer telimi kórme zalynyń qurylysy úshin alynady.
– Memleket muqtajy úshin kórme zalyn salý maqsatynda «Atakent Asia Development» JShS-dan kólemi 1,4617 gektar bolatyn jer telimi men ózge de jyljymaıtyn múlikti májbúrlep ıelikten shyǵarý rásimi bastalsyn, - delingen ákimdik qaýlysynda.
Jer telimin alý jumystaryn 2027 jyldyń 31 jeltoqsanyna deıin aıaqtaý josparlanyp otyr. Memleket menshigine ótkennen keıin jer telimi Almaty qalasynyń Mádenıet basqarmasyna beriledi.