Almatydaǵy «Atakent» aýmaǵyn jańǵyrtý jobasy nelikten toqtap qaldy

ALMATY. KAZINFORM – Almatydaǵy tanymal oryndardyń biri – «Atakent» iskerlik yntymaqtastyq ortalyǵynyń aýmaǵyn jańǵyrtý jumystary bıyl bastalýy kerek bolǵan.

Almaty qalasy qoǵamdyq keńistikterdi damytý basqarmasynyń málimetinshe, ol úshin jobalaý‐smetalyq qujattama ázirlenip, saraptamanyń oń qorytyndysy da alynǵan. Alaıda vedomstvo Almaty qalasynyń prokýratýrasynyń uıǵarymymen joba boıynsha memlekettik satyp alýdyń qorytyndysy joıylǵanyn habarlady.

— Memlekettik satyp alýdyń jeńimpazy anyqtalmaǵandyqtan, qurylys-montaj jumystary bastalǵan joq. Qarjylandyrý josparyna engizilgen ózgeristerge baılanysty «Atakent» aýmaǵyn qaıta josparlaý jobasyn 2026 jyly iske asyrý qarastyrylmaǵan, - delingen jaýapta.

Sondaı-aq basqarma «Atakent» iskerlik yntymaqtastyq ortalyǵynyń 27,1 gektar quraıtyn aýmaǵy Memlekettik jer qoryna tıesili ekenin atap ótti.

Bul másele boıynsha Almaty prokýratýrasy túsinikteme berdi. Qala prokýrorynyń birinshi orynbasary Nursultan Raqyshevtiń jaýabyna sáıkes, «Atakentti» jańǵyrtý jobasyna jarııalanǵan konkýrsqa taldaý júrgizilip, nátıjesinde memlekettik satyp alý týraly zańnama talaptarynyń buzylǵany anyqtalǵan.

— Anyqtalǵan buzýshylyqtardy joıý týraly prokýratýra tıisti memlekettik organǵa usynys engizip, ony qaraý nátıjesinde tapsyrys berýshi konkýrs kúshin joıdy, - dedi ol.

Sonymen qatar Nursultan Raqyshev tapsyrys berýshi is-áreketteriniń quqyqqa sáıkestigine qatysty daý Almaty qalalyq sotynda apellıatsııalyq tártippen qaralyp jatqanyn atap ótti.

— Kórsetilgen mán-jaılarǵa quqyqtyq baǵa sotpen tıisti sot aktisin shyǵarý arqyly beriledi, - dedi qala prokýrorynyń birinshi orynbasary.

Eske salaıyq, «Atakent» aýmaǵyn jańǵyrtý jumystary bastalatynyn birinshi Almatynyń eks-ákimi Erbolat Dosaev aıtty.

Keıin nysandy Almatynyń qazirgi ákimi Darhan Satybaldy jazda aralap kórdi. Almaty ákimdiginiń málimetinshe, qaıta qurý 2025 jyldyń shilde aıynan bastap kezeń-kezeńimen júrgizilýi tıis edi.