Almatydaǵy asa qaýipti ınfektsııalar ortalyǵynda órt shyqty
ALMATY. KAZINFORM — Túnde Almatydaǵy asa qaýipti ınfektsııalar ortalyǵynyń aýmaǵy órtendi.
Áleýmettik jelide polıtsııa qyzmetkerleri M. Aıqymbaev atyndaǵy Ulttyq asa qaýipti ınfektsııalar ortalyǵynyń aýmaǵyndaǵy tótenshe jaǵdaıdy habarlap jatqan vıdeo tarady.
Muny Almaty qalasy Tótenshe jaǵdaılar departamenti men Densaýlyq saqtaý mınıstrliginiń baspasóz qyzmetteri rastady.
Qutqarýshylardyń málimetinshe, 20 qyrkúıek saǵat 23:45–te Jahanger kóshesi, 14 mekenjaıyndaǵy jalyn týraly habar túsken.
— Qutqarýshylar oqıǵa ornyna birneshe mınýttan keıin jetti. Eki qabatty ákimshilik ǵımarattyń ekinshi qabatynda turmystyq tehnıka men zattardyń janyp jatqany anyqtaldy. Órt shamamen 20 sharshy metr aýmaqty qamtyǵan. Saǵat 00:38–de órt tolyq sóndirildi. Zardap shekkender joq, — dep habarlady Almaty qalasy TJD.
Órtti sóndirýge jeke quramnan 20 adam jáne bes arnaıy tehnıka jumyldyryldy.
Órttiń shyǵý sebebi anyqtalyp jatyr. Aldyn ala boljam boıynsha, jalyn qysqa tuıyqtalýdan shyǵýy múmkin.
Densaýlyq saqtaý mınıstrliginiń málimetinshe, órt M. Aıqymbaev atyndaǵy Ulttyq ǵylymı ortalyqtyń ákimshilik ǵımaratyndaǵy qoıma bólmesinde bolǵan.
Órt jedel sóndirilip, zerthanalyq bólmelerge taramaǵan.
— Arnaıy zerthanalyq jumystar júrgiziletin bólmelerge zııany tıgen joq. Juqpaly aýrýlardyń taralý qaýpi de anyqtalmady, — dep habarlady Densaýlyq saqtaý mınıstrligi.
Eske salsaq, Almaty oblysyndaǵy qoqys polıgonynda órt shyqqan edi.
