Almatydaǵy ál-Farabı dańǵylynda bolǵan apattan kólik órtenip, qozǵalys toqtady

ALMATY. KAZINFORM – Almatyda ál-Farabı dańǵylynda úsh kólik soqtyǵysyp, olardyń biri otqa orandy. Osydan keıin qalada uzyn-sonar keptelis paıda boldy.

Kýágerler áleýmettik jelilerde apat bolǵan jerde túsirilgen vıdeolardy jarııalap, qozǵalystyń toqtap turǵanyn aıtyp shaǵymdandy.

Qalalyq polıtsııa departamentiniń málimetinshe, apat 07:00 shamasynda Bostandyq aýdanynda bolǵan. Aldyn ala derekter boıynsha, Toyota avtokóliginiń júrgizýshisi ál-Farabı dańǵylymen batys baǵytta júrip kele jatyp, Jarokov kóshesinen shyǵysqa qaraı qarsy jolaqqa shyǵyp ketip, shyǵysqa qaraı baǵyt alǵan Lexus avtomobılimen soqtyǵysqan.

Jol apatyna túsip, toqtap turǵan Lexus kóligine ál-Farabımen shyǵysqa qaraı júrip kele jatqan Hyundai soǵylǵan. Saldarynan Toyota kóligi órtenip ketken.

Jol apatynan Toyota júrgizýshisi men jolaýshysy, sondaı-aq Lexus júrgizýshisi jaraqat aldy. Bostandyq aýdanynyń polıtsııa qyzmetkerleri oqıǵanyń mán-jaıyn anyqtap jatyr.

Almaty tótenshe jaǵdaılar departamentiniń málimetinshe, 25 qarashada saǵat 07:00-de oqıǵa ornyna órt sóndirý bólimsheleri jiberilgen. Toyota Sienna kóligindegi órt 07:11-de sóndirildi.

Aıta keteıik, túnde Almaty – Bishkek avtojolynyń 65-shaqyrymynda jantúrshigerlik jol apaty bolyp, alty adam qaza tapty. Osy oqıǵaǵa qatysty qylmystyq is qozǵaldy.