Almatydaǵy «aqyldy» baǵdarshamdar men keptelister: ne ózgeredi

ALMATY. KAZINFORM – Almatyda kólik aǵymyn retteýdiń zamanaýı júıesin engizý boıynsha jumys júrip jatyr. Basymdyq qala kóshelerindegi qozǵalysty retteıtin «aqyldy» baǵdarshamdarǵa berilmek. Qazir turǵyndar men qala qonaqtary tarapynan bul nysandardyń jumysyna qatysty shaǵym óte kóp.

Almaty turǵyndarynyń aıtýynsha, baǵdarshamdar jıi isten shyǵady, taımer kórsetkishine qaramastan, onyń túsi kútpegen jerden jasyldan qyzylǵa aýysyp nemese bir túste uzaq ýaqyt turyp qalýy múmkin. Saldarynan bir kóshede uzyn-sonar keptelis paıda bolsa, ekinshisinde kólikter erkin qozǵalady.

Jol qozǵalysyn retteýde mundaı olqylyqtardyń týýyna ne sebep? Almaty qalasynyń Jol qozǵalysyn uıymdastyrý jáne jolaýshylar kóligi basqarmasy osyǵan qatysty túsinikteme berdi.

Basqarmanyń Kazinform suraýyna bergen jaýabyna sáıkes, Almatyda qazirgi tańda 642 baǵdarsham nysany jumys isteıdi Olardyń ishinde tek 98 baǵdarsham ǵana jol qozǵalysyn avtomattandyrylǵan basqarý júıesiniń birinshi kezeńi aıasynda jańǵyrtylǵan. Bul baǵdarshamdar qazirgi talaptarǵa saı jáne kólik qozǵalysyn basqarýda múmkindikteri zor.

– Jobany tolyq júzege asyryp, qalanyń kólik aǵymyn ótkizý múmkindigin arttyrý úshin ekinshi kezeńde qalǵan 544 baǵdarshamdy jańǵyrtyp, qaıta qurý josparlanyp otyr. Qurylys-montaj jumystary bıýdjet qarajaty bólingen jaǵdaıda 2026 jyly bastalady. Joba tolyq iske asqannan keıin, bul júıe qıylystardaǵy jol qozǵalysyn naqty ýaqyt rejıminde retteýge múmkindik beredi. Ol kólik qozǵalysynyń naqty qarqyndylyǵyn eskerip, qozǵalys statıstıkasyn eseptep, taımer tablolarynyń jumysyn da jaǵdaıǵa qaraı avtomatty túrde retteıtin bolady, - deıdi Almaty qalasynyń Jol qozǵalysyn uıymdastyrý jáne jolaýshylar kóligi basqarmasy ókilderi.

Jalpy, «aqyldy» baǵdarshamdar – kólik qozǵalysyn retteý aıasynda júrgiziletin aýqymdy reformanyń tek bir bóligi ǵana.

Almatynyń Tsıfrlandyrý basqarmasynyń málimetinshe, «Almatynyń tsıfrlyq egizi» jobasy engizilgennen keıin jol qozǵalysyn retteý júıesi qaıta uıymdastyrylmaq.

– Bul tsıfrlyq joba Almatyny zamanaýı basqarýdyń negizgi quralyna aınalady. Injenerlik jeliler, kólik, ınfraqurylym jáne túrli qalalyq protsester týraly derekterdi bir platformaǵa biriktirý arqyly bul joba naqty modeldeý men boljaýǵa negizdelgen proaktıvti josparlaýǵa múmkindik beredi.

Bul platforma qala utqyrlyǵyn dál taldaýǵa jaǵdaı jasaıdy. Mobıldi operatorlardyń derekteri, ONAY júıesi, datchıkter jáne basqa da derekkózder negizinde qala turǵyndardyń naqty qozǵalysyn modeldeı alady, qoǵamdyq kólik baǵyttaryn josparlaıdy, engizilgen ózgeristerdiń tıimdiligin baǵalaıdy jáne tekserilgen derekterge súıenip sheshim qabyldaı alady. Nátıjesinde kólik qyzmetiniń sapasy artady jáne qalalyq servıster turǵyndar úshin qolaıly bola túsedi, - delingen basqarma habarlamasynda.

Álemdik tájirıbe mundaı sheshimderdiń tıimdi ekenin kórsetedi: mysaly, Shenchjende tsıfrlyq nusqa jobalardy kelisý merzimin eki esege qysqartqan, Sıngapýrda — ınfraqurylymdy jobalaý men basqarý shyǵyndaryn azaıtqan, al BAÁ qalalary kólik aǵyndaryn ońtaılandyrý jáne jeli júktemesiniń aldyn alý úshin paıdalanady.

– Turǵyndar óz aýdandaryndaǵy jumystar týraly habarlamalar alady, ınfraqurylymdyq jobalardyń barysyn baqylaıdy, balama baǵyttar týraly aqparat ala alady. Júıe tehnıkalyq sharttardy berý jáne kelisý merzimderin de qysqartady. Tsıfrlyq egiz eń aldymen qalalyq ınfraqurylymdy tıimdi josparlaý men basqarýǵa arnalǵan. Júıeniń negizinde úlken derekterdi taldaý, boljaý jáne modeldeý jatyr. Bul protsester jasandy ıntellekt quraldary arqyly júzege asyrylady. JI derekterdi óńdep, zańdylyqtardy anyqtap, boljamdar jasap, basqarýshylyq sheshimder qabyldaýǵa usynystar beredi, - deıdi basqarma ókilderi.

Al «tsıfrlyq egiz» jobasy tolyq iske qosylyp, «aqyldy» baǵdarshamdar jumysy jetildirilgenge deıin, almatylyqtarǵa mamandar birneshe keńes berdi.

Máselen, Almatyda baǵdarshamdar uzaq ýaqyt bir túspen turyp qalsa nemese durys jumys istemese, dereý jol qozǵalysyna jaýapty jergilikti qyzmetterge - Almaty polıtsııa departamentine nemese qalanyń biryńǵaı kezekshi-dıspetcherlik qyzmeti – 112-ge habarlasý qajet. Bul másele jol qaýipsizdigine tikeleı áser etetindikten, mamandar olqylyqty joıýǵa jedel jiberiledi.

Buǵan deıin Almatyda JI kómegimen «aqyldy qala» júıesi damyp jatqanyn jazǵan edik.