Almatydaǵy adam ólimine sebep bolǵan jol apaty boıynsha is qaıta qaralady
ASTANA. KAZINFORM — Almatyda qyzmettik avtobýs pen moped soqtyǵysyp, jol apaty saldarynan adam qaza tapty.
Sot júrgizýshilerdi kináli dep tanyp, marqumnyń paıdasyna 25 mln teńge moraldyq zııan óndirýdi mindettegen. Alaıda avtobýstyń ıesi bolǵan kásiporyn jaýapkershilikke tartylmaǵan. Bas prokýratýranyń narazylyǵynan keıin is qaıta qaraýǵa jiberildi.
Іs materıaldaryn zerdeleý barysynda sot I. jáne K. esimdi júrgizýshilerdi kináli dep tanyǵany anyqtaldy. Olarǵa jábirlenýshiniń paıdasyna 25 mln teńge moraldyq zııandy ortaq tártippen óteý mindettelgen.
Alaıda isti qaraý kezinde mańyzdy másele nazardan tys qalǵan. Jol apatyna qatysqan avtobýstyń ıesi seriktestik azamattyq jaýapker retinde tanylmaǵan. Osylaısha, joǵary qaýiptilik kózi bolyp sanalatyn kólik quralynyń ıesi keltirilgen zııan úshin jaýapkershilikke tartylmaǵan.
Zań talaptaryna sáıkes, joǵary qaýiptilik kózinen keltirilgen zııan úshin onyń ıesi de jaýapkershilik kóterýge tıis. Bul jaǵdaıda kásiporyn óz qyzmetkerleriniń áreketterinen týyndaǵan zııandy óteýge qatysýy múmkin.
Bas prokýratýranyń narazylyǵy boıynsha kassatsııalyq sot azamattyq talap qoıýǵa qatysty sot aktileriniń kúshin joıdy.
Endi is qaıta qaralyp, sottalǵan júrgizýshiler men zańdy tulǵanyń materıaldyq jaýapkershiliginiń mólsheri aıqyndalýǵa tıis.
