Almatydaǵy «Abaı» saıajaıynda kóppáterli turǵyn úıler boı kóterýi múmkin

Sessııa barysynda máslıhat depýtaty Qaırat Begalın «Abaı» saıajaılary boıynsha turǵyndar kótergen máselege toqtaldy.

Onyń aıtýynsha, bul aýmaq 2014 jyly Almaty quramyna kirgen. Sodan beri turǵyndar jer ýchaskeleriniń «baý-baqsha sharýashylyǵy» degen nysanaly maqsatyn jeke turǵyn úı qurylysyna ózgertýdi surap keledi.

— Óıtkeni olar úshin bul óz úıiniń jáne jeriniń mártebesin anyqtaý máselesi. Al usynylǵan bas jospar jobasynda «Abaı» saıajaılary jeke turǵyn úıler aýmaǵy retinde emes, orta qabatty kóppáterli turǵyn úıler aımaǵy retinde kórsetilgen. Turǵyndar «bizdiń úılerimiz turǵan jerde nege kópqabatty qurylys kózdelgen?» dep surap otyr. Osy sheshim ne úshin tańdaldy jáne ol qazir turǵyndardyń úıleri men jer ýchaskelerine qalaı áser etedi, — dedi depýtat.

Qoıylǵan suraqqa Almaty ákiminiń orynbasary Beıbit Shahanov jaýap berdi. Onyń sózinshe, bul aımaq Bas jospardyń jobasyn daıyndaǵan kezde eń kóp talqylanǵan aımaqtardyń biri bolǵan.

— Jergilikti turǵyndarmen birneshe ret kezdesip, bul máseleni jan-jaqty talqyladyq. Bul jer qalanyń ishine kirgennen beri baý-baqsha sharýashylyǵy retinde qalyptasqan. Ol jerge nege ózgeris kerek deseńizder, Naýryzbaı aýdany — qarqyndy damyp, ósip kele jatqan aýdan. Al dál osy jerde qajetti zamanaýı ınjenerlik jeliler ne bolmasa áleýmettik ınfraqurylym joq. Atalǵan aýmaq qala ishine kirgendikten, ony ári qaraı damytý qajet, — dedi ol.

Qala ákiminiń orynbasary halyqpen kezdesýlerden soń, másele jan-jaqty qaralyp, bul aýmaqqa kópqabatty emes, orta qabatty turǵyn úı qurylysy qarastyrylǵanyn aıtty. Onyń ishinde jańa saıabaq, jańa joldar, mektep pen balabaqsha bolady.

Eske salaıyq, Almaty máslıhatynyń depýtattary 2040 jylǵa deıingi Bas josparǵa túzetý jobasyn maquldady.