Almatydaǵy Abaı dańǵyly Úlken Almaty aınalma avtomobıl jolyna deıin uzartylady
ALMATY. KAZINFORM – Abaı dańǵylyn Úlken Almaty aınalma avtomobıl jolyna deıin uzartý úshin 81 jer ýchaskesin satyp alý qajet.
Almatyda jol-kólik ınfraqurylyna túsetin júktemeni azaıtýǵa baǵyttalǵan basty jobalardyń biri - Abaı dańǵylyn Úlken Almaty aınalma avtomobıl jolyna (ÚAAAJ) deıin uzartý. Ol úshin biraz jyldan beri jumystar júrgizilip keledi. 2021 jyly jeltoqsan aıynda Abaı dańǵylynyń boıymen B.Momyshuly kóshesinen Alataý kóshesine deıin uzyndyǵy 3,5 shaqyrym ýchaskeniń qurylysy aıaqtalyp, jol ashyldy.
Al bıyl mamyr aıynyń sońynda Abaı dańǵylyn qala shekarasyna deıin uzartý jumystary aıaqtaldy. Atap aıtqanda, Stroıtelnaıa kóshesinen qala shekarasyna deıingi sońǵy 600 metr joldyń boıyndaǵy jumys bitti. Abaı dańǵylynyń B.Momyshuly kóshesinen bastalatyn uzarǵan bóliginiń jalpy uzyndyǵy – 5,3 shaqyrym.
Endi Almaty oblysynyń ákimdigi qala shekarasynan Úlken Almaty aınalma avtomobıl jolyna deıin Abaı dańǵylyn jetkizýi kerek. Alaıda qazirgi ýaqytta qarqyndy jumystar júrip jatqan joq. Osyǵan oraı, Kazinform tilshisi jaýapty mekemege saýal joldady.
Almaty oblysynyń jolaýshylar kóligi jáne avtomobıl joldary basqarmasynyń jaýabyna sáıkes, Abaı dańǵylyn uzartý boıynsha jobalyq-smetalyq qujattama ázirlenip, ol memlekettik saraptamadan ótip qoıǵan. Joba boıynsha jol boıynda kópir, jolaıryǵy jáne kúrdeli ınjenerlik ınfraqurylym qarastyrylǵan.
- Almaty oblysy aýmaǵynda ornalasqan Abaı dańǵylyn Úlken Almaty aınalma avtomobıl jolyna (ÚAAAJ) deıin uzartý jobasy 2020 jyly ázirlenip, 2022 jyly túzetýden ótti. Jobanyń uzyndyǵy – 3,4 km, jalpy quny – 7,4 mlrd teńge. Qurylys-montaj jumystary 2022 jyly bastaldy, - dep habarlady basqarmadan.
Búginge deıin oblys tarapynan Aqsaı ózeni arqyly kópir men ÚAAAJ-men qosylatyn jolaıryǵy salynǵan. Sondaı-aq jalpy jer qazý jumystarynyń bir bóligi oryndalǵan. Jalpy qurylys jumystarynyń 20%-y oryndalǵan.
- Alaıda qarjylandyrýdyń jetkiliksizdigine baılanysty qurylys jumystary ýaqytsha toqtatyldy. Jobany jalǵastyrý úshin qosymsha qarjy qajet. Osyǵan baılanysty qazirgi ýaqytta jobanyń oryndalýyn aıaqtaý úshin Almaty qalasynyń teńgerimine berý týraly qaýly jobasy ázirlenip jatyr. Qujat bekitilgennen keıin jobany ári qaraı júzege asyrý máselesin Almaty qalasynyń ákimdigi qaraıdy, - delingen basqarma jaýabynda.
Sonymen qatar jol qurylysyna baılanysty jalpy 81 jer ýchaskesin satyp alý qajet. Búginge deıin olardyń 50-i satyp alynǵan, qalǵan ýchaskelerdi satyp alý jumystary qarjylandyrýǵa baılanysty keıinge shegerilgen.
- Atalǵan jobany iske asyrý – Almaty aglomeratsııasynyń kólik júıesin damytý turǵysynan asa mańyzdy. Bul joba qala ishindegi kólik júktemesin azaıtyp, aýdanaralyq kólik qatynasyn jeńildetedi. Sonymen qatar áleýmettik mańyzy bar nysandar men jańa aýdandarǵa qoljetimdilikti qamtamasyz etedi, Almaty oblysy men Almaty qalasy arasyndaǵy kólik baılanysyn kúsheıtedi. Nátıjesinde óńirdiń áleýmettik-ekonomıkalyq damýyna jáne ınvestıtsııalyq tartymdylyǵyna oń yqpal etedi, - dedi Almaty oblysynyń jolaýshylar kóligi jáne avtomobıl joldary basqarma basshysynyń orynbasary Abylaı Jánibekov.
Eske salaıyq, buǵan deıin Almatyda kóshelerdi uzartý úshin 35 mlrd teńgege jer ýchaskeleri satyp alynatynyn jazǵanbyz.