Almatydaǵy № 54 mektep soǵys kezinde áskerı gospıtal bolǵan
ALMATY. KAZINFORM — Almaty qalasyndaǵy № 54 mektep soǵys jyldary maıdan dalasynan jaralanyp qaıtqan jaýyngerlerdi emdeıtin áskerı gospıtal retinde qyzmet atqarǵan. Jeńistiń 80 jyldyǵyn toılaý qarsańynda Kazinform tilshisi tarıhı ǵımarat jaıly málimetter jınap kórdi.
Keńes Odaǵynyń Batyry, general-maıor Ivan Panfılovtyń esimi berilgen № 54 mektep — Almaty qalasynyń tarıhı júreginde, turǵyndar arasynda «Arbat» degen ataýmen belgili jaıaý júrginshiler kóshesiniń boıynda ornalasqan.
Panfılov jáne 316-atqyshtar dıvızııasy
Ivan Panfılov 1941 jyly Almaty qalasynda jergilikti ult ókilderinen 316-atqyshtar dıvızııasyn jasaqtap, Máskeýdi qorǵaýǵa attanǵan.
1941 jyldyń qazan-qarasha aılarynda Máskeý túbindegi Volokolamsk baǵytynda osy dıvızııa jaýǵa qarsy erlikpen shaıqasty.
Bul shaıqastaǵy 28 gvardııashy-panfılovshynyń erligi búkil Keńes áskerine úlgi boldy.
Osy erliktiń qurmetine 316-atqyshtar dıvızııasy Qyzyl Tý ordenimen marapattalyp, keıin Panfılov esimi berildi.
1942 jyly 12 sáýirde Ivan Panfılov Keńes Odaǵynyń Batyry ataǵyna ıe boldy. Sol jyly Almatydaǵy № 54 mektepke onyń esimi berildi.
Mektepten maıdanǵa attanǵan túlekter
— 1939 jyly Almaty qalasynyń Lenın aýdanynda (qazirgi Almaty qalasy Almaly aýdany) № 54 orta mektep ashyldy. 1941 jyly 22 maýsym kúni mektepti bitirý keshinen keıin 21 túlek, synyp jetekshisi jáne fızıka pániniń muǵalimimen birge soǵysqa attandy. Ókinishke qaraı, olardyń ishinen tek ekeýi ǵana elge aman oraldy, — deıdi mektep dırektory Quralaı Oshanova.
Almatylyq Valentın Baıadınov baýyrynyń sol tizimde bolǵanyn bylaı dep eske alady:
— № 54 mektepten soǵysqa attanǵan 21 jigittiń ishinde meniń týysqan baýyrym Anvar Vagapov ta bar edi. Ol 1941 jyldyń qysynda Máskeý túbindegi Volokolamsk baǵytyndaǵy shaıqasta qaza tapty. Súıegi de sol maıdan dalasynda qaldy, — deıdi ol.
Soǵys kezindegi áskerı gospıtal
Ekinshi dúnıejúzilik soǵysy kezinde № 54 mekteptiń synyptary jaraly jaýyngerlerge arnalǵan palatalarǵa, operatsııalyq bólmeler men basqa da medıtsınalyq bólimshelerge aınaldy.
— Estýimizshe, soǵys jyldary mektepte pıoner jetekshisi bolǵan Anna Býfalova men basqa da qyzdar qys mezgilinde ekinshi temirjol vokzalynan jaraly soldattardy shanamen tasyǵan, al mektep ǵımaratynda solardyń jaralary tańylyp, em júrgizilgen, — deıdi mektep dırektory.
Mekteptiń búgini men murasy
Qazir bilim mekemesi resmı túrde Ivan Panfılov atyndaǵy Qazaqstan-Reseı mamandandyrylǵan mektep-lıtseıi dep atalady. Munda 1200 oqýshy bilim alady.
1967 jyly mektep qabyrǵasynda Áskerı dańq mýzeıi ashylǵan.
Murajaıda soǵys jyldaryndaǵy túlekterdiń qujattary, jeke zattary, hattary, fotosýretteri men baılanys quraldary qoıylǵan.
Mýzeı jaqynda kúrdeli jóndeýden ótedi. Qazir daıyndyq jumystary bastalyp ketti.
Mektep basshysy Quralaı Oshanovanyń aıtýynsha, mektepte jyl saıyn Jeńis kúnine arnalǵan birqatar patrıottyq jáne tárbıelik shara ótkiziledi.
— Mundaı sharalar oqýshylardyń tarıhı sanasyn qalyptastyryp, erlik pen otansúıgishtikke tárbıeleıdi. Biz ózimizdi panfılovshylar dep ataımyz, panfılovshylar qozǵalysynyń belsendi múshelerimiz, — deıdi ol.
Qorytyndylaı kele Ivan Panfılov atyndaǵy № 54 mekteptiń tarıhy — soǵys jyldaryndaǵy elge degen janqııarlyq qyzmettiń, erlik pen patrıotızmniń jarqyn úlgisi.
Qazir bul bilim ordasy óz dástúrin laıyqty jalǵastyryp, jas urpaqty otansúıgishtikke, tarıhı sanany qalyptastyrýǵa baǵyttalǵan júıeli jumys júrgizip keledi.
