Almatydaǵy 40 qabatty úıdiń qurylysyna tyıym salmaımyz – ákimdik

ASTANA. KAZINFORM – Almaty qalasynyń ákimi Darhan Satybaldy Májilis depýtaty Sergeı Ponomarevtiń saýalyna joldaǵan jaýapta 40 qabatty turǵyn úı kesheniniń qurylysy ýaqytsha ǵana toqtatylatyny, al onyń ornyna qandaı da bir áleýmettik nysan salý múmkin emestigin aıtty.

- Joǵaryda kórsetilgen obektini jospardan tys tekserý barysynda Qazaqstan Respýblıkasynyń «Qazaqstan Respýblıkasyndaǵy sáýlet, qala qurylysy jáne qurylys qyzmeti týraly» Zańynyń 17-baby 1-tarmaǵy, 4, 4-1, 5, 6 tarmaqshalaryn, 68-baby, 12-tarmaǵy talaptaryn buza otyryp, tapsyrys berýshi kommertsııalyq úı-jaılary men parkıngi bar kópfýnktsıonaldy turǵyn úı keshenin salý úshin shuńqyrdy qazý boıynsha qurylys-montajdaý jumystaryn bastaǵanyn, sondaı-aq munara krany úshin negizdi quıýdy belgilengen tártippen saraptamadan ótken jobalaý-smetalyq qujattamasyz, avtorlyq jáne tehnıkalyq qadaǵalaýlardyń súıemeldeýinsiz, qurylys montajdaý jumystaryn júrgizýdiń bastalǵany týraly habarlamasyz bastaǵany anyqtaldy. 2025 jylǵy 2 qyrkúıektegi jospardan tys tekserý nátıjeleri boıynsha Tapsyrys berýshige qatysty Qazaqstan Respýblıkasynyń «Ákimshilik quqyq buzýshylyq týraly» kodeksiniń 316-baby 1-bóligi, 321-baby boıynsha ákimshilik hattamalar jasalyp, jiberilgen buzýshylyqtardy joıý jáne toqtata turý týraly nusqama berildi, - dep jazylǵan ákim jaýabynda.

Atalǵan nysannyń jobasy tıisti organdardyń maquldaýynan talapqa saı ótken kórinedi.

- Almaty qalasynyń ákimdigi bul ýchaskeniń jeke menshikte bolýyna jáne tapsyrys berýshiniń 40 qabatty turǵyn úı keshenin jobalaýǵa bastapqy ruqsat berý qujattaryn (sáýlet-josparlaý tapsyrmasy, eskızdik jobany kelisý) alýyna baılanysty osy ýchaskede skver nemese áleýmettik obektini qarastyrmaıdy, - deıdi Darhan Satybaldy.

Eske salsaq, Májilis depýtaty Sergeı Ponomarev Almatyda Seıfýllın dańǵyly men Tımırıazev kóshesiniń qıylysynda salynyp jatqan 40 qabatty ǵımarat qurylysyna qarsy shyqqan edi.