Almatydaǵy №4 qalalyq klınıkalyq aýrýhanany jóndeýge 10,6 mlrd teńge bólindi
ALMATY. KAZINFORM – Osy jyldyń naýryz aıynda Almatyda iri medıtsınalyq mekemelerdiń biri №4 qalalyq klınıkalyq aýrýhananyń ǵımaratyn qaıta qurý jumystary bastalady.
Jaqynda qalalyq qurylys basqarmasy Túrksib aýdanynda Papanın kóshesi, 220 mekenjaıynda ornalasqan sharýashylyq júrgizý quqyǵyndaǵy «№ 4 qalalyq klınıkalyq aýrýhana» memlekettik kommýnaldyq kásipornynyń ǵımaratyn qalpyna keltirýge tender ótkizdi. Onyń jalpy quny - 10,6 mlrd teńge. Baıqaý jeńimpazy «BiGlobal» jaýapkershiligi shekteýli seriktestigi boldy.
Ne ózgeredi
Bizdiń agenttiktiń saýalyna ákimdik bul qarajattyń naqty ne úshin jumsalatynyn túsindirdi. Usynylǵan aqparatqa sáıkes, qaıta qalpyna keltirý aıasynda, birinshi qabatta ornalasqan qabyldaý bólimindegi №1, 2, 3, 4, 5a bloktary jańartylyp, seısmıkalyq kúsheıtý jumystary júrgiziledi. Budan bólek, ınjenerlik jabdyqtar men jeliler aýystyrylady.
Sondaı-aq jańa bólimsheler qurý josparda. Atap aıtar bolsaq, shuǵyl qabyldaý bólimi, operatsııalyq bloktar, jansaqtaý, radıatsııalyq dıagnostıka jáne travmatologııa bólimi. Modernızatsııanyń mańyzdy bóligi ınjenerlik júıelerdi jańartý – jeldetýdi, jylý, sýmen jabdyqtaýdy, káriz jáne elektr jelilerin aýystyrý, sondaı-aq lıftilerdi aýystyrý bolmaq.
Sonymen qatar, aýrýhana zamanaýı medıtsınalyq qural-jabdyqtarmen jáne jıhazdarmen jabdyqtalady.
— Joba sondaı-aq múmkindigi shekteýli adamdarǵa arnalǵan ınfraqurylymdy jaqsartýdy, sonyń ishinde pandýstardy, lıftterdi jáne navıgatsııalyq júıeni ornatýdy qamtıdy, — dep atap ótti qurylys basqarmasynan.
Ákimdikten jobanyń halyqaralyq standarttarǵa (JCI, ISO) sáıkes keletinin jáne ǵımarattyń energııa tıimdiligin arttyrýǵa baǵyttalǵanyn atap ótti.
Quryl jumystary osy jyldyń naýryz aıyna josparlanǵan. Kelisimsharttyń merzimi — 11 aı.
Aýrýhana shtattyq rejımde jumys isteıtin bolady
Qalalyq qoǵamdyq densaýlyq saqtaý basqarmasy №4 qalalyq klınıkalyq aýrýhananyń qabyldaý bólimin qaıta qurý boıynsha qurylys-montajdaý jumystary kezinde josparly jáne shuǵyl aýrýhanaǵa jatqyzý qalypty rejımde jumys isteıtinin jetkizdi.
— Ázirlengen qaıta qurý josparyna sáıkes, klınıkanyń jedel járdem qyzmetiniń onyń ishinde №4 qalalyq klınıkalyq aýrýhananyń qabyldaý bólimi men travmatologııalyq pýnktiniń, sondaı-aq mamandandyrylǵan statsıonarlyq bólimshelerdiń úzdiksiz jumysyn qamtamasyz etý qarastyrylǵan, — dep tolyqtyrdy vedomstvodan.
№4 qalalyq klınıkalyq aýrýhanaǵa kún saıyn 250-ge jýyq naýqas shuǵyl medıtsınalyq kómekke júginedi, bul jylyna shamamen 90 000 kelýshi. №4 qalalyq klınıkalyq aýrýhana Túrksib, Jetisý aýdandary men Almaty qalasy Alataý aýdanynyń bir bóliginiń turǵyndaryna qyzmet kórsetedi, sonymen qatar elimizdiń basqa óńirlerinen de naýqastardy qabyldaıdy.
Aıta keteıik, Almatyda osy jyly 120-dan astam áleýmettik nysandy qaıta jańartý jáne salý josparda tur.