Almatydaǵy 2,3 mln aǵash zııankesterge qarsy óńdeýden ótedi
ALMATY. KAZINFORM – Almatyda jasyl jelekterdi zııankesterge qarsy óńdeý jumystary bastalady.
Almaty ákimdiginen málim etkendeı, jasyl jelekterdi bıologııalyq óńdeý maýsymy 20 sáýirde bastalady.
Jumystardy pestıtsıdterdi óndirýge jáne qoldanýǵa lıtsenzııasy bar merdiger uıymdar tórt kezeńde oryndaıdy:
I kezeń: 20 sáýirden 30 mamyrǵa deıin-birinshi óńdeý (tórt ret emen jáne eki ret terek óńdeýdi qosqanda);
II kezeń: 1 maýsymnan 30 maýsymǵa deıin-ekinshi óńdeý;
III kezeń: 5 shildeden 5 tamyzǵa deıin-úshinshi óńdeý;
IV kezeń: 15 tamyzdan 20 qyrkúıekke deıin-tórtinshi óńdeý.
– Jumys túnde júzege asyrylady: tikeleı kún sáýlesiniń bolmaýy baıaý býlaný arqyly zııankesterge qarsy quraldardyń uzaq áser etýine yqpal etedi. 2,3 mln aǵash zııankesterge qarsy óńdeýden ótedi, - delingen habarlamada.
Jumys barysynda adamdarǵa, qustar men janýarlarǵa zııany tımeıtin sertıfıkattalǵan hımııalyq preparattar qoldanylady.
Eske salaıyq, bıyl Almatyǵa 320 myń aǵash otyrǵyzylady.
Bas josparǵa sáıkes, 2030 jylǵa qaraı jasyl aımaqtardyń jalpy aýdany shamamen úsh esege - 1,3 myń gektardan 3,3 myń gektarǵa deıin ulǵaıady, al 2040 jylǵa qaraı ol 3 840 gektarǵa jetedi.