Almatyda zııatkerlik kólik júıesi engiziledi
ALMATY. KAZINFORM – Almaty ákimdigi Kazinform saýalyna joldanǵan jaýapta megapolıste tıimdi kólik qozǵalysyn basqarý maqsatynda Almaty ákimdigi men Qytaıdyń Inspur memlekettik kompanııasy zııatkerlik kólik júıesi (ITS) tujyrymdamasyn ázirlegeni aıtylǵan.
Bıyl 29 sáýirde 600 gazben júretin jáne 200 elektr avtobýsty satyp alýǵa baıqaý jarııalandy. Jeke tasymaldaýshylar óz tarapynan 800 gazben júretin jáne 118 elektr avtobýsty satyp alýdy josparlap otyr.
– Joba boıynsha kelisimshart 2025 jyldyń 20 -shy mamyryna deıin jasalyp, júıe 2026 jyldyń tamyzynda iske qosylady. Sondaı-aq jyl sońyna deıin qalalyq qoǵamdyq kólikti 100% ekologııaly etý kózdelgen,– delingen jaýapta.
Budan bólek, elektr kóligi ınfraqurylymyn damytý úshin 6 ınvestorǵa 233 elektr zarıadtaý stantsııasyn ornatýǵa tehnıkalyq sharttar berildi.
Sonymen qatar, «jasyl» oblıgatsııalar esebinen 100 elektrobýs satyp alyp, 10 trolleıbýs qosalqy stantsııasyn jańǵyrtýǵa qujattar daıyndaldy.
Buǵan deıin habarlanǵandaı, Almaty ákimdigi 2025 jyly alǵash ret «jasyl» oblıgatsııalardy elektrobýs satyp alýǵa ǵana emes, sondaı-aq, Jeltoqsan kóshesindegi BRT jelisiniń qurylysyn jalǵastyrýǵa baǵyttamaq.
Eske salaıyq, Prezıdent Qasym-Jomart Toqaev Almatyǵa jumys sapary kezinde qala ákimi Erbolat Dosaevty qabyldap, shahardy jaryqtandyrý, páterlerge sýdy ýaqtyly jáne tolyq berý, kósheler men aýlalardy abattandyrý boıynsha birqatar tapsyrma bergen bolatyn.
