Almatyda júzdegen úıde jylytý erejeleri buzylǵan

ALMATY. KAZINFORM – Almaty qalasynda órt pen ýly gazdan ýlanýdyń aldyn alýǵa baǵyttalǵan profılaktıkalyq jumys kúsheıtildi.

Almaty qalasy Tótenshe jaǵdaılar departamentiniń málimetinshe, qalada peshpen jylytylatyn jeke úılerde 400-ge jýyq ereje buzý faktileri anyqtalǵan. Odan bólek áleýmettik osal toptaǵy 75 otbasynyń úıine ýly gazǵa qarsy datchıkter ornatyldy.

- Áleýmettik osal top sanatyna kiretin 700-den astam jeke turǵyn úı men 2000-nan astam nysan baqylaýǵa alyndy. «Qaýipsiz baspana» aktsııasy aıasynda departament qyzmetkerleri, prokýratýra, gaz qyzmeti, elektr mamandary men eriktilerden quralǵan vedomstvoaralyq toptar úılerdi aralap júr. Olar buǵan deıin ornatylǵan CO-datchıkterin tekseredi, kómir jáne otynmen kómek kórsetedi jáne muqtaj jandarǵa gýmanıtarlyq kómek jetkizedi, - dep habarlady TJD.

Eske salaıyq, osy jyldyń 8 qazanynan bastap Almatyda jylý berildi.