Almatyda Júsipbek Elebekov atyndaǵy dástúrli ánshiler baıqaýy máresine jetti
ALMATY. KAZINFORM – Almatyda Qazaqstannyń halyq artısi, Memlekettik syılyqtyń ıegeri Júsipbek Elebekovtiń 120-jyldyǵyna arnalǵan ІІ respýblıkalyq kolledjaralyq dástúrli ánshiler baıqaýy ótti.
Án óneriniń kórnekti ókili Júsipbek Elebekovtiń shyǵarmashylyǵyn keńinen nasıhattap, urpaqtan-urpaqqa jetkizýdi maqsat tutqan baıqaýǵa elimizdiń ár óńirinen 35 úmitker qatysty. Onyń 15-i ekinshi kezeńge joldama alyp baq synady.
Eki kúnge sozylǵan án baıqaýyna dástúrli ánshi, Qazaqstannyń halyq artısi Ramazan Stamǵazy, Qazaqstannyń eńbek sińirgen qaıratkerleri Erkin Shúkiman, Jeńis Seıdýllauly, «Qurmet» ordeniniń ıegeri Erlan Tóleýtaı, Mádenıet salasynyń úzdigi, dástúrli ánshi Talǵat Ábýǵazy qazylyq etti.
«Án baıqaýyna kelgen balalarǵa qoıylatyn eń basty talaptar – eń aldymen ánshiniń keremet daýysy, tómengi joǵary notalardy erkin alýy, qolynyń dombyraǵa erkin barýy, ún tazalyǵy, til tazalyǵy, akterlik sheberligi, án aıtyp turǵanda aldyndaǵy kórermenderdi sezinýi, kórermenge jetkizýi jáne ánniń ishki dramatýrgııasyn asha bilýi. Kelgen balalar bizdi syrtymyzdan biledi, jaqyn tanysyp sheberlikterin shyńdaý maqsatynda Batys, Jetisý, Arqa mektepterin qamtı otyryp, sheberlik saǵattaryn ótkizdik», - deıdi Ramazan Stamǵazy.
Júsipbek Elebekov atyndaǵy respýblıkalyq estrada-tsırk kolledjiniń dırektory Jeńis Seıdýllaulynyń aıtýynsha, ultymyzdyń dástúrli án ónerin dáripteýdi maqsat tutatyn sharanyń mádenıet salasynda erekshe orny bar.
«Júsipbek Elebekov – qazaqtyń klassıkalyq án ónerin nasıhattaýshy ári ony asqan sheberlikpen oryndaýdyń eren úlgisin elimizde ǵana emes shetmemleketke tanytqan daryn ıesi. Júsekeńniń asqan ánshilik óneriniń yqpaly búgingi kúnde qaıta jańǵyryp, qaıta túlep jatqan dástúrli mýzyka oryndaýshylarymyzdyń arasynda órkendep, jas býyn ánshilerimiz has sheberdiń án murasyn ózderiniń shyǵarmashylyq úrdisine nysana etip jalǵastyryp saqtap keledi. Osy oraıda uly tulǵa esimin ıelengen qarashańyraqtyń, ánshiniń án murasyn saqtap, urpaqtan-urpaqqa jetkizý maqsatyndaǵy ıgi dástúri bıyl ekinshi ret jalǵasyn taýyp otyr», - dedi ol.
Elimizdiń túkpir-túkpirinen kelgen daryndy ónerpazdar ekinshi kezeńde Bas júlde, 1-2-3 oryndy, Dıplomant ataǵyn jáne «Kórermen kózaıymy» júldesin ózara bólisti.
