Almatyda júrgizýshini tapanshamen qorqytqan azamat ustaldy

Qalalyq polıtsııa departamentiniń málimetinshe, Soltústik aınalma jolynda polıtsııa ekıpajyna «Kia» markaly avtokólik kelip toqtaǵan. Kólik tizgininde otyrǵan shetel azamaty kólikten shyǵyp, tártip saqshylarynan kómek suraǵan. Ony kóliktiń artynda otyrǵan jolaýshy tapanshaǵa uqsas zatpen qorqytyp, júrgizýshiden Almaty oblysyndaǵy eldi mekenderdiń birine aparýdy talap etken.

— Polıtsııa qyzmetkerleri dereý áreket etip, avtokólikti qorshaýǵa alyp, kúdiktini ustady. Tekserý barysynda onyń qolyndaǵy zattyń oıynshyq tapansha ekeni belgili boldy. Atalǵan derek boıynsha sotqa deıingi tergep-tekserý amaldary bastaldy, — dep habarlady departamentten.

Sondaı-aq polıtsııa kúdiktini ustaý kezinde jol-kólik oqıǵasy tirkelgenin atap ótti. Resmı málimetke sáıkes, ótip bara jatqan kólikterdiń biriniń júrgizýshisi oqıǵaǵa alańdap, taksı kóligimen soqtyǵysqan.

Eske salaıyq, buǵan deıin Almaty polıtsııasy túngi ýaqytta estilgen atys daýsyna túsinikteme berdi.