Almatyda júrgizýshiler úsh kúnde 1 400 ret zań buzǵan

ALMATY. KAZINFORM — Almatyda jolaýshylar tasymalyn tekserý kezindegi úsh kún ishinde 1 453 quqyq buzýshylyq anyqtaldy.

Tekserý barysynda jolaýshylar tasymaldaıtyn kólik júrgizýshileri arasynda eń jıi tirkelgen zań buzýshylyqtar mynalar boldy

• jolaýshylardy tasymaldaý qaǵıdalaryn buzý — 178;
• kólik basqarý kezinde uıaly telefon paıdalaný — 84;
• mindetti tehnıkalyq baıqaýdan ótpeý — 66;
• tehnıkalyq aqaýy bar kólikpen júrý — 56 derek.

Sonymen qatar 19 júrgizýshiniń kólik basqarý quqyǵy bolmaǵany anyqtaldy. Mas kúıde kólik tizgindegen 11 adam ustalyp, qarsy baǵyttaǵy jolaqqa shyqqan 7 jaǵdaı tirkeldi. Jalpy 39 kólik quraly mamandandyrylǵan aıypturaqqa qoıyldy.

Polıtseıler tasymaldaýshylardyń qyzmetine baqylaý aldaǵy ýaqytta da jalǵasatynyn málimdedi.

Eske salaıyq, buǵan deıin Almatyda 34 júrgizýshi qoǵamdyq kólik basqarýdan shettetilgenin jazǵan edik.