Almatyda júrgizýshi kórshisin kólikpen ádeıi qaqqan

ALMATY. KAZINFORM – Almatyda turǵyn úıdiń aýlasynda júrgizýshi kóligimen adamdy qaǵyp ketti. Kýágerlerdiń aıtýynsha, ol kórshisin ádeıi soqqan.

Áleýmettik jelide taraǵan vıdeodan joldan ótip bara jatqan er adamdy kólik kelip soqqanyn kórýge bolady. Jazba avtorlarynyń sózinshe, júrgizýshi óz kórshisin qasaqana qaqqan.

 

Almaty polıtsııa departamentiniń málimetinshe, oqıǵa boıynsha Jetisý aýdandyq polıtsııa basqarmasy qylmystyq is qozǵaǵan.

– Eki er adamnyń arasynda turmystyq janjal bolǵany anyqtaldy. Qazir júrgizýshi ustalyp, ýaqytsha ustaý ızolıatoryna qamaldy, - dep málimdedi polıtsııanyń baspasóz qyzmeti.

Vedomstvo ókilderi kez kelgen daýdy zań sheńberinde sheshý keregin eskertti. Árbir quqyqbuzýshylyq úshin zańmen jaýapkershilik qarastyrylǵan.

Eske salaıyq, buǵan deıin Almatyda Jandosov pen Beregovoı kósheleriniń qıylysynda jedel járdem kóligi jaıaý júrginshini qaǵyp ketkenin habarlaǵan edik.

Qazir bul oqıǵanyń mán-jaıyn Áýezov aýdandyq polıtsııa basqarmasy anyqtap jatyr.