Almatyda júrgizýshi qarsy jolaqqa shyǵyp, birneshe kólik soqtyǵysty
ALMATY. KAZINFORM — Almatynyń Jetisý aýdanyndaǵy Soltústik aınalma jolynda úsh kólik jol apatyna tústi.
Almaty polıtsııasynyń málimetinshe, oqıǵa keshki saǵat 21:00 shamasynda boldy.
Aldyn ala málimet boıynsha, ońtústik baǵytta kele jatqan Toyota júrgizýshisi qarsy qozǵalys jolaǵyna shyǵyp, qarsy baǵytta kele jatqan Chevrolet kóligimen soqtyǵysqan. Soqqydan Chevrolet ınertsııamen qozǵalyp, taǵy bir kólikke, ıaǵnı Volvo-ǵa soǵylǵan.
Jol-kólik oqıǵasyna qatysýshylardyń birnesheýine medıtsınalyq kómek qajet boldy. Apattyń ózge de mán-jaılary men sebepteri anyqtalyp jatyr.
— Polıtsııa qarsy qozǵalys jolaǵyna shyǵý joldaǵy eń qaýipti quqyq buzýshylyqtardyń biri ekenin eskertedi. Róldegi bir qatelik sanaýly sekýnd ishinde birneshe adamnyń ómiri men densaýlyǵyna áser etetin aýyr zardapqa ákelýi múmkin, — delingen habarlamada.
Eske salaıyq, Qonaevta bala kólik astyna túsip, mert bolǵan edi.
