Almatyda júrektiń aýyr aqaýy bar júkti áıelge shuǵyl ota jasaldy

ALMATY. KAZINFORM – Almaty qalalyq kardıologııa ortalyǵynda dárigerler 37 jastaǵy júkti áıel men onyń sábıiniń ómirin saqtap qaldy. Asa kúrdeli sımýltantty operatsııa shuǵyl túrde jasalyp, ana men bala úshin jalǵyz múmkindik boldy, dep habarlaıdy Densaýlyq saqtaý mınıstrligi.

Patsıent júktiliktiń 30-aptasynda óte aýyr jaǵdaıda jetkizilgen. Dárigerler oǵan aortanyń túbirinen qursaq bóligine deıin sozylǵan ajyraıtyn anevrızma dıagnozyn qoıǵan. Bul – sanaýly mınýttardyń ishinde ólimge ákelýi múmkin asa qaýipti jaǵdaı. Ahýaldy týa bitken júrek aqaýy – qosjarmaly aortalyq qaqpaqshanyń krıtıkalyq stenozy odan ári kúrdelendirgen.

Áıel buǵan deıin Qytaıda turyp, sol elde medıtsınalyq baqylaýda bolǵan. Alaıda jaǵdaıynyń kúrt nasharlaýyna baılanysty Qazaqstanda shuǵyl kómek qajet bolǵan. Qazirgi ýaqytta patsıent Almaty qalasynda turady.

- Eki birdeı ómirge tóngen qaterge baılanysty emdeý taktıkasy mýltıdıstsıplınarlyq tásil negizinde qurylǵan. Kardıohırýrgter, akýsher-gınekologtar, reanımatologtar, neonatologtar jáne basqa da beıindi mamandar jumyldyryldy, - delingen aqparatta.

Operatsııany №2 qalalyq perınataldyq ortalyqtyń akýsher-gınekologtarymen birlesip Almaty qalasy Qoǵamdyq densaýlyq saqtaý basqarmasynyń Ana men bala densaýlyǵyn qorǵaý bóliminiń basshysy Jadyra Ahmetova júrgizdi.

Birinshi kezeńde shuǵyl kesar tiligi jasalyp, salmaǵy 1450 gramm bolatyn qyz bala dúnıege keldi. Osydan keıin dárigerler ana ómirin saqtap qalýdyń ekinshi, odan da kúrdeli kezeńine – ashyq júrekke jasalatyn operatsııaǵa kiristi.

Qalalyq kardıologııa ortalyǵynyń dırektory Ermagambet Qýatbaevtyń jetekshiligimen kardıohırýrgter Bentall–De Bono ádisi boıynsha mehanıkalyq protez ımplantatsııasymen joǵary tehnologııalyq ota jasady. Bul aralasý aortanyń jarylý qaýpin joıyp, patsıenttiń jaǵdaıyn turaqtandyrýǵa múmkindik berdi.

- Dárigerlerdiń jedel ári úılesimdi jumysynyń arqasynda ana men balanyń ómiri saqtaldy.

Qazirgi ýaqytta áıel Qalalyq kardıologııa ortalyǵynda em qabyldap jatyr, jaǵdaıy turaqty. Jańa týǵan náreste №2 qalalyq perınataldyq ortalyqtyń reanımatolog dárigerleriniń táýlik boıǵy baqylaýynda. Náresteniń jaǵdaıy aýyr dep baǵalanýda, alaıda oń dınamıka baıqalady. Dárigerler onyń ómiri úshin kúresti jalǵastyryp jatyr, - dep málimdedi mınıstrlikten.

Aıta keteıik, Jambyl oblysynda perzenthanadaǵy ana ólimine baılanysty jospardan tys tekserý bastaldy.