Almatyda júrekke jylyna 500 ashyq ota jasalady
ALMATY. KAZINFORM — Almatyda júrek-qan tamyry aýrýyna shaldyqqan naýqastarǵa joǵary tehnologııalyq medıtsınalyq kómek kórsetetin qalalyq Kardıologııalyq ortalyq jumys isteıdi.
Ortalyq dırektory Ermaǵambet Qýatbaevtyń aıtýynsha, emhananyń tarıhy 1896 jyldan bastaý alady. Sol jyly Vernyı qalasynda 15 tósekke arnalǵan Qyzyl Krest aýrýhanasy ashylǵan. Keıin ol qalalyq jedel medıtsınalyq járdem klınıkalyq aýrýhanasyna aınalyp, 2007 jylǵy 1 qańtardan bastap derbes uıym — Almaty qalalyq Kardıologııalyq ortalyǵy bolyp qaıta qurylǵan.
Qazir ortalyq elimizdegi eń úlken beıindi medıtsınalyq mekemeniń biri sanalady. Munda jyl saıyn 40 myńnan astam adam ambýlatorııalyq tekserýden ótip, shamamen 11 myń naýqas statsıonarlyq em alady.
— Qazirgi tańda munda joǵary tehnologııalyq medıtsınalyq kómektiń 18 túri kórsetiledi. Jyl saıyn mamandar shamamen 6 700 angıografııa, 3 myńǵa jýyq koronarlyq arterııalardy stentteý operatsııasyn, 500-den astam ashyq júrekke ota men 1 myńnan astam ınterventsııalyq arıtmologııalyq em-sharany júzege asyrady, — dedi Ermaǵambet Qýatbaev.
Eske salaıyq, Almaty oblysynda 10 jyl boıy isiktiń zardabyn tartyp kelgen áıelge ota jasaldy.
