Almatyda júrekke kúrdeli operatsııalar tikeleı efırden kórsetildi
ASTANA. KAZINFORM - Almaty qalasy Qalalyq kardıologııalyq ortalyǵy bazasynda mınıınvazıvti kardıohırýrgııa (MICS) boıynsha sheberlik saǵaty ótti.
Іs-sharaǵa Oral, Aqtaý, Pavlodar, Shymkent, Astana, Semeı, Óskemen, Taldyqorǵan, Kókshetaý, Almaty jáne Aqtóbe qalalarynan kelgen 69 kardıohırýrg pen perfýzıolog qatysty.
Sheberlik saǵatynyń negizgi bóligi retinde Ortalyqtyń kardıohırýrgtary naqty ýaqyt rejıminde LIVE-operatsııalar ótkizdi.
Іs-shara aıasynda mıtraldy qaqpaqshanyń mınıınvazıvti plastıkasy, aortalyq qaqpaqshany (Perceval) protezdeý jáne júreksheler aralyq perde aqaýyn plastıkalaý operatsııalary sátti oryndaldy.
Qatysýshylardyń erekshe qyzyǵýshylyǵyn operatsııalyq toptyń jumysyn tikeleı efırde baqylaý múmkindigi týdyrdy.
LIVE-operatsııalar barysynda kardıohırýrgtar hırýrgııalyq taktıka, patsıentterdi irikteý krıterııleri jáne MICS salasyndaǵy zamanaýı tásilder boıynsha tájirıbe almasyp, belsendi pikirtalas júrgizdi.
Sonymen qatar, Ortalyq kardıohırýrgtarynyń úılesimdi komandalyq jumysyna erekshe nazar aýdaryldy. Bul joǵary kásibı ózara árekettestikti, dáldik pen operatsııanyń barlyq kezeńderindegi úılesimdilikti kórsetti.
Sheberlik saǵaty aıasynda mınıınvazıvti kardıohırýrgııany damytý, transóńeshtik ehokardıografııanyń (ChPEhoKG) róli, anestezıologııalyq qamtamasyz etý jáne kardıohırýrgııadaǵy zamanaýı trendter taqyryptarynda saraptamalyq baıandamalar usynyldy.
Osyǵan deıin habarlaǵanymyzdaı, Densaýlyq saqtaý mınıstrligi telemedıtsınalyq qyzmetterdi damytýǵa jańa standarttar engizdi.
