Almatyda júrek transplantatsııasyn jasatqan alǵashqy adam úıine shyǵaryldy
ALMATY. KAZINFORM – Qalalyq júrek ortalyǵynan 34 jastaǵy naýqas shyǵaryldy. Ol qarasha aıynda QKO bazasynda alǵash ret júrek transplantatsııasyn jasatty. Naýqastyń jaǵdaıy turaqty. Bul týraly Densaýlyq saqtaý mınıstriliginiń baspasóz qyzmeti habarlady.
Esterińizge sala keteıik, patsıent – termınaldy sozylmaly júrek jetkiliksizdigi dıagnozy qoıylǵan 34 jastaǵy er adam buryn júrek transplantatsııasyn kútýdiń respýblıkalyq paraǵynda bolǵan.
Júrek transplantatsııasy operatsııasy 5 saǵattan astam ýaqytqa sozyldy jáne sátti aıaqtaldy. Transplantatsııany Almaty qalalyq kardıologııalyq ortalyǵynyń mýltıdıstsıplınarlyq komandasy University Medical Center (Astana) birlese otyryp, QKO dırektory Ermaǵambet Qýatbaev pen UMC KF basqarma tóraǵasy, professor ıÝrıı Vladımırovıch Pıa basshylyǵymen oryndady. UMC komandasy áriptesterin qoldaý úshin Almatyǵa jedel keldi.
Qalalyq kardıologııalyq ortalyqta joǵary tehnologııalyq operatsııalardy júrgizý úshin barlyq qajetti jaǵdaı jasalǵan: joǵary bilikti kardıologter, kardıohırýrgter, anestezıolog-reanımatologter, perfýzıologter jáne operatsııalyq medbıkeler jumys isteıdi, dıagnostıka men emdeýdiń zamanaýı ádisteri engizildi, halyqaralyq standarttarǵa sáıkes jabdyqtar qoldanylady.
Naýqas dárigerlerge jáne qalalyq júrek ortalyǵynyń barlyq medıtsınalyq qyzmetkerlerine qutqarylǵan ómiri úshin shyn júrekten alǵysyn bildirip, komandanyń joǵary kásibıligin jáne emdeýdiń barlyq kezeńderinde zeıindi kózqarasyn atap ótti. Onyń aıtýynsha, búginde ol jaqyndarynyń janynda tolyqqandy ómirge oralý múmkindigin erekshe baǵalaıdy.
– Men adamdarǵa eskertkim keledi: energetıkalyq sýsyndardy ishpeńiz. Men úshin bári osydan bastaldy. Aldymen bul kúnine bir bótelke, sodan keıin kúnine 8-10 Energetık boldy. Men aýyr dıagnozǵa tap bolǵanǵa deıin oǵan mán bergen joqpyn. Búgin men qolymnan kelgenniń bárin jasaǵan dárigerlerdiń arqasynda tirimin. Endi men óz densaýlyǵyma uqypty qaraýdyń qanshalyqty mańyzdy ekenin túsinemin, - dep atap ótti naýqas.
Shyǵarylǵannan keıin patsıent emhanada tirkelgen jeri boıynsha dınamıkalyq baqylaýda bolady. Júrekti transplantatsııalaýdy, statsıonarda emdeýdi, shyǵarylǵannan keıin qajetti dárilik preparattarmen qamtamasyz etýdi, sondaı-aq odan ári ońaltý men baqylaýdy qosa alǵanda, barlyq medıtsınalyq kómek TMKKK sheńberinde memleket esebinen tegin usynylady.
Esterińizge sala keteıik, ınsýlt alǵan arterııalyq gıpertenzııanyń aýyr aǵymy bar 50 jastaǵy áıel donor boldy.
Almatynyń Ortalyq qalalyq klınıkalyq aýrýhanasyna shuǵyl gospıtalızatsııadan keıin dárigerler konsılıýmy mıdyń ólimin anyqtap, qaıtys bolǵannan keıingi donorlyq múmkindigin rastady. Týystary kelisim berdi, sodan keıin donorlyq protsess uıymdastyryldy.
Eske sala ketsek, osyǵan deıin Almatyda júrek yrǵaǵy buzylǵan naýqastarǵa alǵash ret CSP ımplanty salynǵanyn jazǵanbyz.