Almatyda júrek yrǵaǵy buzylǵan naýqastarǵa alǵash ret CSP ımplanty salyndy

ALMATY. KAZINFORM — Almaty qalalyq kardıologııa ortalyǵynda alǵash ret júrektiń ótkizgish júıesin fızıologııalyq stımýlıatsııalaýdyń jańa býyndaǵy júıelerin ımplantatsııalaý otasy júrgizildi. 

Almaty qalasy qoǵamdyq densaýlyq saqtaý basqarmasynyń málimetinshe, qurylǵylar júrek yrǵaǵy buzylǵan úsh naýqasqa ornatyldy. Implantatsııaǵa arıtmologııa bóliminiń meńgerýshisi Artýr Abdymomýnov pen Polsha shaqyrylǵan sarapshy — professor Kshıstof Bochar jetekshilik etken.

— Ota barysynda CLS tehnologııasymen jabdyqtalǵan elektrokardıostımýlıatorlar qoldanyldy. Bul tehnologııa júrek soǵý jıiligin fızıkalyq jáne emotsııalyq júktemelerge qaraı retteýge múmkindik beredi. Júrek jetispeýshiligi qaýpin tómendetedi jáne naýqastardyń ómir sapasyn jaqsartady, — dep habarlady basqarmadan.

Ortalyq dırektory Ermaǵambet Qýatbaev zamanaýı tehnologııalardy engizý jáne dárigerlerdi ozyq ádisterge úıretý qalanyń kardıologııalyq qyzmetin damytýdaǵy mańyzdy baǵyt ekenin atap ótti.

Eske salaıyq, buǵan deıin Almaty dárigerleri 76 jastaǵy zeınetkerge sátti ota jasaǵanyn jazǵanbyz.