Almatyda júreginde isigi bar naýqasqa kúrdeli ota jasaldy
ALMATY. KAZINFORM – Almaty qalalyq kardıologııa ortalyǵynyń dárigerleri júrekishilik úlken isigi bar naýqasqa – sol jaq atrıým mıksomasyn alyp tastaý operatsııasyn jasady.
Almaty qalalyq densaýlyq saqtaý basqarmasynan málim etkendeı, naýqas, 53 jastaǵy er adam, entigý men júrek soǵýyna shaǵymdanǵan. Júrekke ýltradybystyq zertteý júrgizgennen keıin sol jaq atrıýmnyń jazyqtyǵynda jyljymaly ólshemi shamamen 6 sm isik tizilimi – sol jaq qarynshanyń qýysyna prolabırlengen mıksoma anyqtaldy.
Dárigerlerdiń aıtýynsha, isik naýqastyń ómirine qaýip tóndirdi. Óıtkeni ol bólshektenýi múmkin jáne onyń bólikteri qanǵa túsip, mı jáne basqa da mańyzdy múshelerdi qamtamasyz etetin qan arterııalarynyń bitelýine ákelýi múmkin.
«Atalǵan jaǵdaıda bul ásirese ózekti boldy, Sebebi ol birneshe jyl buryn ınsýlt alǵan. Naýqasqa jedel túrde jasandy qan aınalymy jaǵdaıynda isikti alyp tastaý otasy jasaldy. Ota eki saǵatqa sozyldy jáne ashyq ádispen júrgizildi. Hırýrgııalyq aralasý kezinde mıksoma mólsheri ýltradybystyq zertteýge qaraǵanda úlkenirek 9 sm-den asatyny anyqtaldy», - deıdi kardıohırýrgııa meńgerýshisi Nurjan Músirepov.
Ota sátti ótti. Qazir patsıent dárigerlerdiń baqylaýynda. Onyń ómirine esh qaýip tónip turǵan joq.
