Almatyda júregi aýyratyn naýqastarǵa smartfon arqyly basqarylatyn defıbrıllıatorlar ornatyldy
Kardıologııa jáne ishki aýrýlar ǵylymı zertteý ınstıtýtynda patsıentterge qashyqtan monıtorıng júıesine qosý múmkindigimen jańa býyn defıbrıllıatory ornatyldy. Sol arqyly qashyqtan baqylaýǵa bolady. Ol úshin naýqastyń uıaly telefonyna arnaıy baǵdarlama júkteledi, dep habarlaıdy QazAqparat tilshisi.
Kardıologııa jáne ishki aýrýlar ǵylymı zertteý ınstıtýtynyń Basqarma tóraǵasy Marat Pashımovtyń aıtýynsha, júrek jetkiliksizdigi aýrýyna shaldyǵyp, defıbrıllıator qoıylǵan naýqastar qashyqtan monıtorıng júıesine qosylady. Mundaı tehnologııa kez kelgen jerden baqylaýǵa múmkindik beredi.
«Almatyda alǵash ret bizdiń klınıkada júrek qyzmetiniń jetkiliksizdigi bar patsıentterge qashyqtan monıtorıng júıesine qosý múmkindigimen jańa býyn defıbrıllıatorlary ımplantatsııalandy. Mundaı tehnologııa júrektiń kenetten toqtap qalýyn, aýrýdyń aýyr zardaptaryn boldyrmaý úshin emdeý shemasyn túzetedi. Bul respýblıkalyq ortalyqtarǵa defıfıbrılıator ımplantatsııalanǵannan keıin tekserýge kele almaıtyn eldiń basqa aımaqtarynan kelgen naýqastar úshin óte qolaıly. Zamanaýı tehnologııalar patsıenttiń telefonyna arnaıy qosymshany ornatý arqyly baqylaýǵa múmkindik beredi. Derbes derekter shıfrlanady jáne ortalyqtandyrylǵan serverge túsedi, oǵan tek osy saladaǵy sertıfıkattalǵan mamandar ǵana qol jetkize alady», - deıdi Marat Pashımov.
Júrek yrǵaǵy men ótkizgishtiginiń buzylýy bólimshesiniń meńgerýshisi Bagdat Ahyt sózinshi, qazir qazaqstandyq dárigerler kardıostımýlıatordy engizýdi jaqsy meńgerip alǵan. Biraq elektrodtardy ımplantatsııalaý boıynsha áli de tájirıbeni arttyra túsý kerek.
«Ekstraktsııa (alý) kezindegi klınıkalyq jaǵdaı tez ózgerýi múmkin, sondyqtan komanda kez kelgen jaǵdaıǵa daıyn bolýy kerek. Uzaq ýaqyt ımplantatsııalanǵan elektrod alynǵan kezde júrek bulshyqetiniń jyrtylýy sııaqty asqynýlarǵa nemese ólimge ákelýi múmkin. Mundaı jaǵdaılarda operatsııa nátıjesi komandanyń - tek arıtmologtar ǵana emes, sonymen qatar anestezıologtar, transfýzıologtar, perfýzıologtar, kardıohırýrgtar, tehnıkalyq qyzmetkerler jáne basqalardyń úılesimdi jumysymen qamtamasyz etiledi»,- dedi ol.
Reseılik arıtmolog dáriger Sergeı Artemenko qazaqstandyq áriptesterine dál osy júrek yrǵaǵy men ótkizgishtigine qatysty bilgenimen bólisýge arnaıy kelgen. 10 kún ishinde 50-ge jýyq operatsııa jasaý josparlanyp otyr.
