Almatyda jumystan aıyrylýyna baılanysty tólem alatyndar sany 60%-ǵa kóbeıgen
ALMATY. KAZINFORM — Almatyda jyl basynan beri 94 myńnan astam adam áleýmettik tólem aldy.
Halyqty áleýmettik qorǵaý salasyndaǵy retteý jáne baqylaý komıteti departamentiniń basshysy Murat Muratbekovtyń aıtýynsha, birinshi jartyjyldyqta memlekettik áleýmettik saqtandyrý qorynan 94 myńnan astam almatylyq áleýmettik tólem aldy. Turǵyndardy qoldaýǵa jalpy 48,5 mlrd teńge baǵyttalǵan.
Áleýmettik tólemniń kóbi balaly otbasylarǵa baǵyttalǵan. Júktilik pen bosanýǵa baılanysty áleýmettik tólemdi 9 586 jumys isteıtin áıel alsa, olarǵa jalpy 12,1 mlrd teńge tólengen. Taǵy 46 283 adam bala 1,5 jasqa tolǵanǵa deıingi kútimine áleýmettik tólem alyp otyr. Buǵan 21,8 mlrd teńge jumsalǵan.
Sondaı-aq bıyl jumysynan aıyrylýyna baılanysty beriletin áleýmettik tólem boıynsha eń joǵary ósim tirkeldi. Ótken jyldyń birinshi jartyjyldyǵynda mundaı tólemdi 17 707 adam alyp, oǵan 5,9 mlrd teńge jumsalǵan. 2026 jyly olardyń sany 25 510 adamǵa jetip, tólem kólemi 9,5 mlrd teńgege jetken. Jalpy ósim — 59%.
Odan bólek asyraýshysynan aıyrylýyna baılanysty osy jyldyń 6 aıynda 5 223 otbasyǵa 2,1 mlrd teńge tólengen. Al eńbekke qabilettiliginen aıyrylǵan azamattarǵa jarty jylda 2,9 mlrd teńgege kómek kórsetildi.
Eske salaıyq, Qazaqstanda bir apta ishinde áleýmettik mańyzy bar azyq-túlik taýarlary arzandady.
