Almatyda jumyssyz jastarǵa arnalǵan bos oryndar jármeńkesi ótti
ALMATY. KAZINFORM - Almaty qalasynyń Almaly aýdanynda joǵary oqý oryndary men kolledjderdiń túlekterin, sondaı-aq qalanyń jumyssyz jastaryn jumysqa ornalastyrýǵa baǵyttalǵan Almaly Career Day mansap kúni ótti.
Sharany Almaty qalasy jastar saıasaty basqarmasy uıymdastyrdy.
Almaly aýdanynyń ákimi Arman Shamshınniń málimetinshe, aýdanda 14 pen 35 jas aralyǵyndaǵy 83407 jas turady.
«Onyń ishinde NEET jastarynyń úlesi 4,7 myń (5,6%). Jastardy jumyspen qamtý — olardyń eńbek naryǵyna tabysty ıntegratsııalanýyn jáne óńirdiń áleýmettik damýyn qamtamasyz etý jolyndaǵy biz úshin mańyzdy taqyryp. Mundaı is-sharalardy ótkizý jastardy qoldaý jáne NEET sanatyndaǵy jastardy azaıtýdaǵy mańyzdy qadam „, — dedi Almaly aýdanynyń ákimi Arman Shamshın.
Sharaǵa IT, qarjy, bilim berý jáne ártúrli saladaǵy 70-ten astam jetekshi kompanııa men 2 myńnan astam jas qatysty.
Qatysýshylar arasynda bos jumys oryndaryn usynýǵa daıyn iri korporatsııalar da, perspektıvaly startaptar da boldy.
«Jastardy jumyspen qamtý úshin qalalyq mansap ortalyǵy ashylyp, ózekti mamandyqtar boıynsha qysqa merzimdi kýrstar bastaldy. „Jas Almaty“ mobıldi qosymshasy iske qosyldy. Sonymen qatar, qalamyzdyń ár aýdanynda 8 komıýnıtı-ortalyq ashyldy. Ár ortalyqta jumysqa ornalastyrý boıynsha konsýltanttar kómek kórsetedi. Dál osyndaı mansap kúnder ár aýdanda ótkizý josparlda. Kelesi mansap kúni 10 mamyrda Medeý aýdanynda „Kók bazar“ saýda aýmaǵynda ótedi», — dedi Jastar saıasaty basqarmasynyń basshysy Qaıyrjan Meńdiǵalıev.
Aıta keteıik, mansap kúnderi — bul úzdik kompanııalar ózderiniń bos jumys oryndary men daryndy mamandar úshin múmkindikterin usynatyn alań.
Aıdyń sońyna deıin osyndaı bos oryndar jármeńkesi qalamyzdyń barlyq aýdandarynda ótedi.
