Almatyda Jumabaev kóshesiniń bóligi 1 aıǵa jabylady
ALMATY. KAZINFORM - Almatynyń Jumabaev kóshesinde kólik qozǵalysyna ýaqytsha shekteý engiziledi.
Almaty ákimdiginiń málimetinshe, Jetisý aýdanynda káriz jelilerin qaıta jańǵyrtý jumystarynyń júrgizilýine baılanysty Jumabaev kóshesiniń Selskaıa kóshesinen Jansúgirov kóshesine deıingi bóliginde kólik qozǵalysy shekteledi. Atalǵan jol ýchaskesi 16 maýsymnan 20 shildege deıin jabyq bolady.
- Kólik qozǵalysy Omarov jáne Palladın kósheleri arqyly qamtamasyz etiledi. Qalalyq ınfraqurylymdy jańǵyrtý jáne tozǵan jelilerdi aýystyrý aıasynda Jetisý aýdanynda 716 metr káriz qubyry jańartylady. Atalǵan jeli 1967 jyly paıdalanýǵa berilgen, - dep habarlady ákimdikten.
Sondaı-aq qala ákimdigi qurylys-montajdaý jumystary júrgiziletin kezeńde barlyq tutynýshylar úshin sýyq sýmen jabdyqtaý jáne sý burý qyzmetteri tolyq kólemde saqtalatynyn atap ótti. Jumys júrgiziletin aýmaqta eskertý jol belgileri jáne aınalyp ótý baǵyttarynyń syzbalary ornatylǵan.
Eske salaıyq, buǵan deıin Astanada Tóle bı kóshesiniń bir bóligi bir aıǵa jabyldy.
